Í bókinni Sér grefur gröf eftir Yrsu Sigurðardóttur er óhugnanlegt morð framið á nýju heilsuhóteli á Snæfellsnesi. Bærinn þar sem hótelið stendur reynist þekktur fyrir reimleika. Þóra Guðmundsdóttir, sem lesendur þekkja úr Þriðja tákninu, er réttargæslumaður eigandans og liggur hann undir grun. Rannsókn hennar leiðir í ljós hörmulega atburði er áttu sér stað á bóndabænum fyrir mörgum áratugum en hafa legið í þagnargildi allar götur síðan. En tengjast þeir eitthvað morði á ungri konu sumarið 2006?

 

Sér grefur gröf, sem væntanleg er á fjölda tungumála, fékk lofsamlega dóma þegar bókin kom út fyrir jólin 2006. Þórarinn Þórainsson sagði meðal annars í Fréttablaðinu að Sér grefur gröf byggi yfir öllu því sem góð morðgáta þyrfti að hafa, Yrsa hefði stimplað sig hressilega inn í glæpadeildina með Þriðja tákninu og héldi dampi í Sér grefur gröf.

 

Óttar M. Norðfjörð skrifaði í DV að Sér grefur gröf væri frábær spennusaga sem ríghéldi lesandanum og dansaði á fínni línu húmors og hrollvekju og skenkti Yrsu fjórar stjörnur af fimm mögulegum.

 

Á bokmenntir.is sagði Ingibjörg Rögnvaldsdóttir að Yrsa væri "flinkur höfundur" og Sér grefur gröf "skemmtilegur reyfari". Þá sagði Hávar Sigurjónsson í Morgunblaðinu að þetta væri ágætlega fléttuð saga og upphafskaflinn hjartaskerandi.

 

Sér grefur gröf er 384 blaðsíður að lengd. Ragnar Helgi Ólafsson hannaði kápu. Bókin er brotin um í Odda en prentuð í Nörhaven. Leiðbeinandi útsöluverð er 1.990 krónur.