YRSA SIGURÐARDÓTTIR

Yrsa Sigurðardóttir (1963) er í hópi fremstu glæpasagnahöfunda Norðurlanda, að mati breska stórblaðsins The Times. Yrsa vakti mikla athygli þegar hún sendi frá sér sína fyrstu glæpasögu, Þriðja táknið haustið 2005. Áður en sagan kom út á íslensku hafði útgáfurétturinn verið seldur víðar en dæmi voru áður um þegar um íslenskt verk er að ræða. Þá hafði verið gengið frá samningum um útgáfu á bókinni á ellefu tungumálum í yfir þrjátíu löndum. Þriðja táknið kemur um þessar mundir út á yfir 30 tungumálum í yfir 100 löndum í öllum byggðum heimsálfum veraldar.

Engin íslensk skáldsaga eftir núlifandi höfund er væntanleg á jafn mörgum tungumálum og Þriðja táknið. Um Yrsu er fjallað í erlendum stórblöðum og tímaritum á borð við New York Times, Times Literary Supplement, Daily Telegraph, Wall Street Journal, Stern og víðar.

Önnur glæpasaga Yrsu, Sér grefur gröf, kom út hjá Veröld í nóvember 2006 en útgáfurétturinn á henni hafði þá þegar verið seldur um allan heim, m.a. til Bandaríkjanna, Bretlands, Þýskalands, Ítalíu og til allra spænskumælandi landa heims. Sér grefur gröf er tilnefnd til Shamus-verðlaunanna í Bandaríkjunum sem veitt verða í október 2010. Síðan hefur Yrsa sent frá sér glæpasögurnar Ösku (2007), Auðnina (2008),  Horfðu á mig (2009), Ég man þig (2010), Brakið (2011) og Kulda (2012) sem allar eru væntanlegar á ýmsum tungumálum.

Yrsa Sigurðardóttir hóf feril sinn sem barnabókahöfundur árið 1998 með bók sinni Þar lágu Danir í því. Hún hlaut Íslensku barnabókaverðlaunin árið 2003 fyrir Biobörn. Árið 2000 fékk hún viðurkenningu Barnabókaráðs Íslands, Íslandsdeildar IBBY, fyrir bókina Við viljum jólin í júlí.

Meðfram skriftum starfar Yrsa sem verkfræðingur í Reykjavík.