Aldís Hafsteinsdóttir, bæjarstjóri í Hveragerði, bloggaði á dögunum um bækur sem hún er að lesa um þessar mundir, milli þess sem hún pælir "í gegnum skýrslur og greinargerðir ásamt því að reyna af veikum mætti að komast yfir það að lesa dagblöðin," eins og hún segir á bloggi sínu. Á dögunum las hún Sér grefur gröf eftir Yrsu Sigurðardóttur sér til mikillar ánægju. "Las reyndar "Þriðja táknið" í fyrra," segir hún, "en nýja bókin er að mínu mati betri. Mæli með þessari."

Aldís tekur þannig undir með þeim sem hafa hælt Yrsu fyrir nýju bókina á þessari jólabókatíð. Hún hefur verið sögð flinkur höfundur, menn skrifa að bókin búi yfir öllu sem góð morðgáta þurfi að hafa, hrósa því hvernig sagan sé fléttuð og gefa henni fjórar stjörnur af fimm mögulegum.