„Bókin um sögu Wikileaks er opinberun," segir Páll Baldvin Baldvinsson í umsögn sinni um bókina WikiLeaks - Stríðið gegn leyndarhyggju í Fréttatímanum í dag og gefur bókinni fjórar stjörnur. "Sagan er reyfarakennd og einstök heimild um hið svokallaða frjálsa kerfi upplýsinga. ... Sagan sem blaðamennirnir rekja er spennandi þótt þeir gangi býsna langt í lýsingum sínum, býsna berorðum, um persónulega hagi Assange." Áður hafði Páll Baldvin sagt í Kiljunni að þetta sé "hin merkasta bók".

meira >

WikiLeaks - Stríðið gegn leyndarhyggju er "hin merkasta bók, skrifuð af mönnum í storminum miðjum," sagði Páll Baldvin Baldvinsson í Kiljunni og bætti því við að hún gæfi okkur "einstæða sýn á hvað gerðist þarna eftir að Assange nær sambandi við Guardian". Þá hældi Páll Baldvin þýðingu Arnars Matthíassonar. Kolbrún Bergþórsdóttir hnykkti á því að bókin væri "snaggaralega skrifuð" og þetta væri "harðsoðin rannsóknarblaðamennska". Þá nefndi Kolbrún að hún hefði framan af óttast að Julian Assange yrði gerð að einhverri hetju í bókinni en sem betur fer breyttist það þegar á liði.

 

Bókin er sem kunnugt er skrifuð á mettíma og þýdd jafnvel ennþá hraðar; hún var gefin út í Bretlandi þann 1. febrúar og þremur dögum síðar var hún komin í verslanir á Íslandi.

meira >

WikiLeaks - Stríðið gegn leyndarhyggju er ein mest selda handbók vikunnar, samkvæmt metsölulista Eymundssonar sem birtur er í dag. Bókin kom í verslanir um nýliðna helgi og hefur þegar vakið mikla athygli. Meðal annars má lesa kaflabrot úr bókinni í Fréttatímanum 4. febrúar sl. Þá er athyglisvert að Ég man þig eftir Yrsu Sigurðardóttur er enn á metsölulistanum og Snjóblinda Ragnars Jónassonar fylgir þar fast á eftir en báðar bækur eru væntanlegar í kilju fljótlega. Í tilefni af því drögum við út þrjá af póstlista Veraldar og geta þeir vitjað vinninga sinna hjá útgáfunni að Bræðraborgarstíg 9. Hinir heppnu eru:

 

einardis@simnet.is hlýtur WikiLeaks - Stríðið gegn leyndarhyggju

 

LaufeyO@siminn.is fær Ég man þig eftir Yrsu Sigurðardóttur

 

kristin@ki.is fær Snjóblindu eftir Ragnar Jónasson

 

meira >

Út er komin hjá Veröld bókin WikiLeaks – Stríðið gegn leyndarhyggju eftir David Leigh og Luke Harding, blaðamenn á Guardian. Á örskömmum tíma hefur WikiLeaks fengið ráðamenn um allan heim upp á móti sér með afhjúpunum á skjölum sem aldrei áttu að koma fyrir almenningssjónir. Saga uppljóstrunarsíðunnar er dramatísk og ævintýri líkust.

Ísland og Íslendingar koma mjög við sögu WikiLeaks; þegar blaðamenn Guardian reyndu ákaft að ná sambandi við óþekktan Ástrala, Julian Assange, sem átti að sitja á sannkallaðri fjölmiðlabombu var þeim bent á að tala annaðhvort við Kristin Hrafnsson eða Birgittu Jónsdóttur. Og hér á landi var fyrsta sprengja síðunnar búin til birtingar.

Höfundar bókarinnar hafa haft ótakmarkaðan aðgang að öllum helstu persónum og leikendum í þessum sögulegu atburðum. Hér er lesendum veitt einstök innsýn í herbúðir WikiLeaks í stríðinu gegn leyndarhyggju stjórnvalda og er bókin á köflum eins og æsilegasta spennusaga. Bókin kom út í Bretlandi fyrr í vikunni og er fjallað um atburði allt fram í miðjan janúar. Bókin kemur nú út samtímis víða um heim. meira >

Hringnum lokað eftir Michael Ridpath var gefin út í Danmöku þann 11. janúar síðastliðinn en bókin kom út hjá Veröld nú fyrir jól. Skemmst er frá því að segja að Danir halda ekki vatni yfir bókinni, segja að sagan sé "heillandi og hörkuspennandi", menn geta ekki beðið eftir framhaldinu, þetta er "sannfærandi og skemmtileg glæpasaga" og hún er óaðfinnanlega skrifuð. Hringnum lokað gerist sem kunnugt er hér á landi og er fyrsta bók Ridpaths um Magnús Ragnarsson lögreglumann sem búið hefur og starfað í Boston um langt árabil en snýr til Íslands. Hringnum lokað kemur fljótlega út í kilju hér á landi en næsta bók Ridpaths í seríunni er væntanleg á íslensku í haust. meira >

Þriðjudagsmorgun einn í nóvember 2010 sást sérkennilegur hópur fólks troða sér inn í lúna bifreið í Paddington hverfinu í London: hörkulegur Íslendingur, nördaleg ungmenni og óvenju hávaxin eldri kona í kápu og með slæðu. Konan var sjálfur Julian Assange í dulargervi. Hópurinn var á leið á leynilegan felustað, með slökkt á öllum farsímum af ótta við að starfsmenn varnarmálaráðuneytis Bandaríkjanna fylgdust með þeim. Förinni var heitið á sveitasetur fyrrum foringja í breska hernum sem skotið hafði skjólshúsi yfir það sem kallað var mesti leki sögunnar.

 

Á þessum viðburðum hefst bókin WIKILEAKS – Stríðið gegn leyndarhyggju eftir blaðamenn á breska dagblaðinu Guardian en bókin kemur út hjá Veröld nú febrúar, á sama tíma og hún verður gefin út í Bretlandi, Bandaríkjunum og víða um heim. Ísland og Íslendingar koma  sem kunnugt er mjög við sögu WikiLeaks, s.s. Kristinn Hrafnsson og Birgitta Jónsdóttir. Höfundarnir hafa haft ótakmarkaðan aðgang að öllum helstu persónum og leikendum í þessu sögulega máli, allt frá diplómötum og stjórnmálamönnum til Julian Assange sjálfs.

meira >

Ég man þig eftir Yrsu Sigurðardóttur virðist hafa mögnuð áhrif á lesendur, ef marka má pistil Ragnheiðar Tryggvadóttur í Fréttablaðinu í gær. Þar segir meðal annars: "Ég heyri fólk lýsa hvernig hræðslan náði heljartökum á því við lesturinn svo það gat hvorki hreyft legg né lið. Einhverjir gátu ekki lagt bókina frá sér og lásu hana næturlangt í einum rykk, stjarfir af ótta. Mættu svo vansvefta og hvekktir eftir lesturinn til vinnu sinnar, með ónot um sig alla. Aðrir urðu svo hræddir að þeir þurftu að taka löng hlé frá lestrinum til að jafna sig áður en þeir gátu haldið áfram." Ég man þig fór hvað eftir annað í efsta sæti metsölulista fyrir jólin, var næst mest selda skáldsaga nýliðins árs, hlaut frábæra dóma og virðast gagnrýnendur á einu máli um að þetta sé besta bók Yrsu Sigurðardóttur. Og lesendur eru greinilega djúpt snortnir! meira >

Árni Matt - Frá bankahruni til byltingar er "hreinskilnasta uppgjör íslensks stjórnmálamanns við hrunið," segir Pétur Gunnarsson í umsöng sinni um bók þeirra Árna M. Mathiesen og Þórhalls Jósepssonar í Fréttablaðinu í dag og bætir við að þeir félagar eigi hrós skilið fyrir bókina. Hann skenkir henni þrjár stjörnur.

 

"Markverðustu pólitísku tíðindin í bókinni held ég," segir Pétur, "að felist í þeim lærdómi sem Árni dregur af reynslu sinni af því að ræða við erlenda ráðamenn vikurnar í kringum hrunið haustið 2008. Niðurstaða hans er sú að ætli Íslendingar sér að leita bandamanna erlendis standi aðeins einar dyr opnar, það eru dyr Evrópusambandsins." Þá segir Pétur að lýsingar á fundum ráðherra með bankamönnum í aðdraganda hrunsins séu forvitnilegar, "þegar ráðherrarnir gera sér fyrst grein fyrir því á síðustu metrunum að eigendur bankanna hafa verið að beita þá blekkingum."

meira >

Ég man þig eftir Yrsu Sigurðardóttur er mest selda bók vikunnar, samkvæmt metsölulista Eymundssonar sem birtur er í dag. Bókin er uppseld á lager í 16.000 eintökum en enn munu eintök fáanlega í verslunum. Stelpur eftir Kristínu og Þóru Tómasdætur er mest selda barna- og unglingabókin eina ferðina enn og er fjórða prentun nálega á þrotum hjá útgáfunni - 9.000 eintök, takk fyrir. Þá er Þór - Leyndarmál guðanna eftir Friðrik Erlingsson í níunda sæti barnabókalistans. meira >

"Vel byggð, vel stíluð og spennandi sakamálasaga með góðri persónusköpun og lausn sem kemur lesanda algjörlega í opna skjöldu," segir Friðrika Benónýsdóttir í Fréttablaðinu í dag um Snjóblindu Ragnas Jónassonar og skenkir henni þrjár stjörnur. "Sagan er mjög vel byggð og prýðilega skrifuð. Spennan er byggð upp hægt og bítandi og eins og við á í sakamálasögu af þessari gerð stendur lesandinn sig að því að gruna hverja persónuna á fætur annarri um ódæðin. Lausnin er snjöll og kemur gjörsamlega á óvart, sem er mikill og allt of fáséður kostur í sakamálasögum," segir hún enn fremur og bætir við að hann blandi "sér hressilega í slaginn um krónprins- og kóngstitilinn sem einhver blessaður gagnrýnandinn setti í gang meðal íslenskra krimmahöfunda."  meira >