Bandaríska risaforlagið Macmillan tryggði sér í gær á bókamessunni í Frankfurt útgáfuréttinn á Ösku eftir Yrsu Sigurðardóttur. Á sýningunni náðust einnig samningar við Quetzal Editores um útgáfu á bókinni í Portúgal. Aska kom út í Bretlandi nú í sumar og fékk afar lofsamlega dóma, Yrsa var m.a. sögðu „svar Íslands við Stieg Larsson“ í Daily Telegraph.  Sagan hefur komið út víða um lönd, meðal annars í Englandi, Þýskalandi, Frakklandi, Grikklandi, Póllandi, Danmörku, Svíþjóð, Noregi og Tékklandi, að viðbættum öllum hinum spænskumælandi heimi. Önnur glæpasaga Yrsu, Sér grefur gröf, er tilnefnd til bandarísku Shamus-glæpasagnaverðlaunanna en þau eru veitt ár hvert fyrir bækur með einkaspæjurum í aðalhlutverki. Sér grefur gröf er eina þýdda glæpasagan sem tilnefnd er til verðlaunanna í ár en samtök bandarískra glæpasagnahöfunda sem veita þau. Upplýst verður 15. október hver hlýtur þau í ár. meira >

Í tilefni af því að eintak númer 80.000 mun seljast af glæpasögu eftir Yrsu Sigurðardóttur núna á næstunni, bráðskemmtileg bók um forvitna mús er að koma út og Snjóblindu Ragnars Jónassonar er spáð mikilli velgengni drögum við út þrjá heppna af póstlista Veraldar. Vinningshafarnir geta vitjað glaðningsins í höfuðstöðvum Veraldar að Bræðraborgarstíg 9.

karenb@tmd.is fær nýja útgáfu af Ösk.

edda@mfa.is fær hina splukunýju bók Má ég kíkja í bleyjuna þína?

gudgu@simnet.is fær Snjóblindu eftir Ragnar Jónasson um leið og hún kemur úr prentsmiðjunni.

meira >

Má ég kíkja í bleyjuna þína eftir Guido van Genechten er bráðskemmtileg myndabók með flipum um hrikalega forvitna mús. Músi verður að skoða allt sem hann sér, jafnvel bleyjur vina sinna. Hann kannar málið hjá Héra, Geitu, Voffa, Kusu, Fáki og Svínku. En þegar þau vilja líka fá ða sjá hvað er í bleyjunni hans verða þau heldur en ekki hissa! meira >

Í haust eru fimm ár liðin frá því að Yrsa Sigurðardóttir sendi frá sér sína fyrstu glæpasögu, Þriðja táknið. Síðan hafa bæst við Sér grefur gröf, Aska, Auðnin og Horfðu á mig. Allar hafa þær selst í stórum upplögum hér á landi og setið í meira en 250 vikur á metsölulista Eymundssonar. Innan skamms mun eintak númer 80.000 af glæpasögu Yrsu seljast og fær sá  heppni veglega bókargjöf frá Veröld og fyrsta eintakið af væntanlegri spennusögu hennar sem kemur út í nóvember, áritað og glóðvolgt, beint úr prentsmiðjunni.

meira >

Snjóblinda eftir Ragnar Jónasson "verður örugglega í toppbaráttunni á jólabókamarkaðinum í ár," segir á vefnum Siglfirdingur.is. Á vefnum er miklu lofi hlaðið á kápu bókarinnar og hún sögð "algjört meistaraverk, og þó bara smjörþefurinn af því sem er inni fyrir." Þess má geta að Ragnar Jónasson og Ragnar Helgi Ólafsson kápuhönnuður eru bræðrasynir og ættaðir frá Siglufirði en bærinn er einmitt sögusvið Snjóblindu.

 

Á Siglufirði finnst ung kona blóðug og hálfnakin í snjónum, nær dauða en lífi. Aldraður rithöfundur deyr á grunsamlegan hátt á æfingu hjá áhugaleikfélagi bæjarins, daginn fyrir frumsýningu. Ari Þór Arason, nýútskrifaður lögreglumaður, reynir að komast að því hvað er satt og hvað er logið í samfélagi þar sem engum virðist hægt að treysta. Einangrunin, myrkrið og snjórinn þrengja að honum, óttinn nær tökum á bæjarbúum og gleymdir glæpir fortíðar koma upp á yfirborðið.

meira >

Danska bókaútgáfan Lindhardt og Ringhof hefur tryggt sér útgáfuréttinn á Auðninni eftir Yrsu Sigurðardóttur. Þetta er fjórða bók Yrsu sem forlagið tekur til útgáfu en áður hafa komið út hjá því Þriðja táknið, Sér grefur gröf og Aska. Nú þegar hefur verið samið um útgáfu á Auðninni í Bretlandi, Þýskalandi, Frakklandi og víðar. Bókin kom upphaflega út árið 2008 og varð meðal söluhæstu titla fyrir jólin það ár. Dómar voru lofsamlegir og sagði Páll Baldvin Baldvinsson meðal annars að þetta væri hörkutryllir og besta bók Yrsu. Ári síðar var hún gefin út í Þýskalandi þar sem hún hlaut afar góðar viðtökur, var m.a. valin bók vikunnar í Spiegel. Yrsa leggur nú lokahönd á sjöttu spennusögu sína, Ég man þig, sem kemur út nú í nóvember.

 

meira >

Spói eftir Ólaf Jóhann Sigurðsson er í öðru sæti barnabókalista Eymundssonar sem birtur var í vikunni. Þá er bókin sú sjöunda mest selda þegar allir titlar eru taldir með. Spói kom upphaflega út árið 1962 en hefur nú verið endurútgefinn í nýjum og glæsilegum búningi. Bókina prýða fallegar myndir af fuglum í náttúru Íslands eftir Jón Baldur Hlíðberg og henni fylgir geisladiskur með lestri Ólafíu Hrannar Jónsdóttur á sögunni. meira >

Föstudaginn 17. september kl. 17-18 kynnir Úlfar Þormóðsson bók sína Þú sem ert á himnum - Rýnt í bresti biblíunnar með guði almáttugum í Eymundsson, Skólavörðustíg. Boðið verður upp á léttar veitingar.

Úlfar Þormóðsson er eini núlifandi Íslendingurinn sem dæmdur hefur verið fyrir guðlast. Í bókinni fer hann Úlfar í gegnum biblíuna, bók fyrir bók, og leitast við að draga upp mynd af þeim guði sem þar er að finna. meira >

Laugardaginn 18. september klukkan 11.00 hefst Rýmingarsala bókaútgefenda í Borgartúni 29. Þar verða á boðstólum þúsundir titla af öllum stærðum og gerðum sem eiga það eitt sameiginlegt að vera á dúndrandi afslætti. Á rýmingarsölunni verður sérstaklega mikið úrval barnabóka en einnig glæsilegar handbækur, magnaðar spennusögur, stórbrotin skáldverk, svo fátt eitt sé nefnt. Útgefendur rýma til fyrir nýju jólabókunum - nú á allt að seljast. Láttu ekki happ úr hendi sleppa, mættu í Borgartúnið strax á laugardag því að takmarkað upplag er af sumum titlum. meira >

Þú sem ert á himnum. Rýnt í bresti biblíunnar með guði almáttugum er ný bók eftir Úlfar Þormóðsson en hann er eini núlifandi Íslendingurinn sem dæmdur hefur verið fyrir guðlast.

 

Í bókinni fer Úlfar í gegnum biblíuna, bók fyrir bók, og leitast við að draga upp mynd af þeim guði sem þar er að finna. Á ferð sinni um hina helgu bók hnýtur Úlfar um fjölmargt sérkennilegt í og kemst m.a. að því að sá himnafaðir sem þar er að finna er býsna ólíkur þeim góðlátlega guði sem kirkjan boðar að vaki yfir velferð okkar. Inn á milli bregður höfundurinn sér inn í nútímann og tengir innihald biblíunnar veruleika okkar og útleggingum kirkjunnar manna á bók bókanna. Bókin er skrifuð í léttum og aðgengilegum stíl og byggir höfundurinn á biblíulestri til margra áratuga. Þetta er bók sem fær lesandann til að velta rækilega fyrir sér þeim grunni sem kirkjan byggir á og hvernig hann rímar við veruleikann og yfirbygginguna. 

meira >