Yrsa Sigurðardóttir var á dögunum í Prag að fylgja eftir útkomu glæpasögu sinnar Ösku.

Hún las úr verkum sínum í stærstu bókabúð borgarinnar og spjallaði við þarlenda lesendur. Á myndinni með Yrsu er útgefandi hennar, Helena Herynková, og á borðinu má sjá bækur hennar, Þriðja táknið, Sér grefur gröf og Ösku á tékknesku. Aska verður næst gefin út í Englandi í lok júlí en fyrir utan tékknesku og ensku er bókin komin út eða væntanleg á þýsku, frönsku, dönsku, norsku, sænsku,spænsku, slóvakísku, grísku og pólsku.

meira >

Yrsa Sigurðardóttir er meðal þeirra höfunda sem bandarískir lesendur munu líta til, segir stórblaðið New York Times í forsíðugrein í dag, úr því að fleiri verka er ekki að vænta úr smiðju Stieg Larssons. Í greininni er fjallað um mikla velgengni þríleiks Larssons um Mikael Blomkvist og Lisbeth Salander og sagt að útgefendur og lesendur leiti nú logandi ljósi að arftökum Larssons í hópi norrænna höfunda. Þar er Yrsa nefnd sem hugsanlegur kyndilberi, ásamt Henning Mankell, Karin Fossum, Jo Nesbo og Kjell Eriksson. Í nýrri ævisögu Larssons, The Man Who Left Too Soon, veltir höfundurinn  Barry Forshaw, því fyrir sér hvaða norrænu höfundar muni taka við keflinu frá Larsson, því að lesendur þyrsti í meira, og er Yrsa talin upp önnur í röðinni á eftir Henning Mankell sem einstaklega hæfileikaríkur höfundur (a unique talent) en Forshaw nefnir einnig Arnald Indriðason í því sambandi.

 

Þess má geta að New York Times birti lofsamlega umsögn um Þriðja táknið þegar bókin kom út vestra og breska stórblaðið The Times hefur sagt að Yrsa sé í fremstu röð norrænna glæpasagnahöfunda.

meira >

Hrunadans og horfið fé eftir Styrmi Gunnarsson er "sumarreyfarinn í ár" að mati Andrésar Magnússonar blaðamanns sem ritar gagnrýni um bókina í Sunnudagsmoggann um helgina. Hann gefur bókinni fjórar stjörnur og segir: "Í henni er mikill fengur. Styrmir skrifar skýran og knappan stíl, kemur sér beint að efninu og er laus við alla tilgerð. Bókin er vel upp byggð, svo lipurlega skrifuð að vandalaust er að lesa hanaí einum spretti og þolir jafnvel að vera lesin aftur." Hann segir að höfuðkostur beggja bóka Styrmis um hrunið, Umsátrið sem kom út fyrir síðustu jól og Hrunadans og horfið fé, að þær veki lesandann til umhugsunar og krefji hann sjálfan ábyrgrar afstöðu og svara. "Umfram allt er Hrunadansinn fyrirtaks innleiðing í hið tröllaukna viðfangsefni þjóðarinnar um það hvað í ósköpunum gerðist og hvernig megi reyna að afstýra því að slíkt gerist nokkru sinni aftur. Hrunadansinn hlýtur að vera sumarreyfarinn í ár," segir Andrés Magnússon í lok umsagnar sinnar. meira >

Aska eftir Yrsu Sigurðardóttur kemur um þessar mundir út hjá risaforlaginu Santillana á Spáni og verður henni dreift um allan hinn spænskumælandi heim. Aska hefur komið út á eða er væntanleg á ellefu erlendum tungumálum. Santillana hefur einnig gefið út Sér grefur gröf og Þriðja táknið eftir Yrsu. Næsta útgáfa Ösku sem lítur dagsins ljós er í Bretlandi nú í lok júlí en auk þess hefur verið samið um útgáfu bókarinnar á þýsku, frönsku, dönsku, sænsku, norsku, pólsku, tékknesku, slóvakísku og grísku. Aska er þriðja glæpasaga Yrsu Sigurðardóttur. Sumarið 2007 koma í ljós líkamsleifar við uppgröft húss sem fór undir ösku í eldgosinu í Eyjum árið 1973. Á sama tíma finnst kona myrt í Reykjavík. Og Þóra Guðmundsdóttir lögmaður glímir við spurninguna: Hvernig tengjast þessi voðaverk?

Þýðandi bókarinnar, Enrique Bernárdez, hefur marga fjöruna sopið, m.a. þýtt verk eftir Halldór Laxness, Sjón, Arnald Indriðason, Thor Vilhjálmsson, Guðberg Bergsson og Njáls sögu, svo nokkuð sé nefnt, auk þess að snara tveimur fyrri bókum Yrsu, Þriðja tákninu og Sér grefur gröf.

 

 

meira >

Hrunadans og horfið fé eftir Styrmi Gunnarsson fór beint á toppinn á metsölulista Eymundssonar í liðinni viku og heldur sínu striki á listanum sem birtur er í dag. Þá er Horfðu á mig eftir Yrsu Sigurðardóttur enn á metsölulistanum en bókin hefur verið setið þar nánast óslitið síðan hún kom út í nóvember í fyrra í innbundnu formi og síðan í kilju í febrúar. Raunar má segja að Yrsa hafi setið á metsölulista Eymundssonar allt frá því að hún hóf að skrifa glæpasögur árið 2005! meira >

Réttindastofa Bjarts og Veraldar hefur gengið frá samningi við pólska forlagið Muza um að gefa út Horfðu á mig eftir Yrsu Sigurðardóttur. Horfðu á mig kom út á liðnu hausti, var ein mest selda bók jólavertíðarinnar og töldu gagnrýnendur þetta vera hennar bestu bók til þessa. Þá hefur kiljuútgáfa bókarinnar setið á metsölulista Eymundssonar frá því að hún kom út nú í febrúar. Þar með hefur Muza tryggt sér réttinn á öllum glæpasögum Yrsu, fimm talsins. Aska kom nýverið út á pólsku og nefnist W proch się obrócisz.

Yrsa er um þessar mundir stödd á Crimefest í Bristol í Bretlandi þar sem hún kemur tvívegis fram í panel, auk þess sem hún er þar til skrafs og ráðagerða með útgefendum sínum þar í landi vegna glæpasögu hennar, Þsku, sem væntanleg er á ensku nú í júlí. Eins og gefur að skilja hefur öskugosið í Eyjafjallajökli sett nokkurt strik í reikninginn hvað þá útgáfu varðar en sagan nefnist á tungu Elisabetar drottningar Ashes to Dust.

meira >

Hrunadans og horfið fé eftir Styrmi Gunnarsson rauk beint í fyrsta sæti metsölulista Eymundssonar sem birtur er í dag. Bókin hefur að geyma úttekt Styrmis á grundvallaratriðum Skýrslu rannsóknarnefndar Alþingis. Hann kynnir einmitt bók sína í Eymundsson, Skólavörðustíg, í dag kl. 17. Í bókinni fjallar Styrmir á gagnrýninn hátt um bankana og einkavæðingu þeirra, hvernig þeir stjórnuðu verði hlutabréfa í sjálfum sér – og hver í öðrum – og verðbréfasjóði á villigötum. Hann ritar um útrásarvíkinga, Fjármálaeftirlitið, Seðlabankann, ríkisstjórn landsins, fjölmiðla og hjarðhegðun smáþjóðar, svo fátt eitt sé nefnt.

 

Í bókinni er að finna heildstæða úttekt á skýrslunni sem markaði þáttaskil í þjóðfélagsumræðunni auk þess sem horft er fram á veginn. Hér kemur Styrmir Gunnarsson lesandanum hvað eftir annað á óvart með því að setja hlutina í nýtt og óvænt samhengi og viðrar sjónarmið sem munu vekja miklar umræður og jafnvel deilur.

meira >

Styrmir Gunnarsson kynnir bók sína Hrunadans og horfið fé – Skýrslan á 160 síðum í Eymundsson, Skólavörðustíg, kl. 17, miðvikudaginn 19. maí og eru allir velkomnir. Hrunadans og horfið fé kom út hjá Veröld miðvikudaginn 12. maí, sléttum fjórum vikum eftir að Skýrsla rannsóknarnefndar Alþingis var gefin út. Bókin hefur að gefa úttekt Styrmis á grundvallaratriðum skýrslunnar. Hann fjallar á gagnrýninn hátt um bankana og einkavæðingu þeirra, hvernig þeir stjórnuðu verði hlutabréfa í sjálfum sér – og hver í öðrum – og verðbréfasjóði á villigötum. Hann ritar um útrásarvíkinga, Fjármálaeftirlitið, Seðlabankann, ríkisstjórn landsins, fjölmiðla og hjarðhegðun smáþjóðar, svo fátt eitt sé nefnt.

 

Í bókinni er að finna heildstæða úttekt á skýrslunni sem markaði þáttaskil í þjóðfélagsumræðunni auk þess sem horft er fram á veginn. Hér kemur Styrmir Gunnarsson lesandanum hvað eftir annað á óvart með því að setja hlutina í nýtt og óvænt samhengi og viðrar sjónarmið sem munu vekja miklar umræður og jafnvel deilur.

 

meira >

Yrsa Sigurðardóttir og Michael Ridpath verða saman í panel á Crimefest í Bristol þann 23. maí næstkomandi. Svo skemmtilega vill til að þau eru bæði Veraldarhöfundar. Veröld hefur gefið út fimm glæpasögur Yrsu sem seldar hafa verið út um allar jarðir og spennusaga Ridpaths, Hringnum lokað, er væntanleg nú í haust en sagan gerist einmitt hér á landi. Yfirskrift panelsins er Sex & Drugs & Rock & Roll: The Business of Telling Lies - the Good, the Bad, the Ugly of writing Crime. Aðrir þátttakendur í umræðunni eru Joan Brady, sem fyrst kvenna hlaut hin virtu Whitbred-verðlaun og - fram til þessa - eini Bandaríkjamaðurinn, og Peter Guttridge sem er bæði rithöfundur og gagnrýnandi glæpasagna fyrir Guardian. Hann hefur m.a. hælt á hvert reipi Sér grefur gröf eftir Yrsu í blaðinu.

 

Yrsa ræðir einnig á Crimefest um uppgang þýddra glæpasagna í Bretlandi í kjölfar velgengni bóka Stieg Larssons og Ridpath verður í panel með öðrum höfundum sem valið hafa sér alþjóðlegt umhverfi fyrir bækur sínar.

 

Fyrir þá sem þora að fljúga úr landi er hér að finna heimasíðu glæpasagnaþingsins en enn er hægt að skrá sig!

meira >

Í tilefni af útkomu bókar Styrmis Gunnarssonar, Hrunadans og horfið fé - Skýrslan á 160 síðum og velgengni Yrsu Sigurðardóttur á Bretlandseyjum drögum við út tvö netföng af póstlista Veraldar sem hljóta Hrunadans Styrmis og Horfðu á mig eftir Yrsu. Hinir heppnu geta vitjað vinnings síns á Bræðraborgarstíg 9:

bjornb@snerpa.is fær Hrunadans og horfið fé eftir Styrmi Gunnarsson.

kristrunt@hotmail.com fær Horfðu á mig eftir Yrsu Sigurðardóttur.

 

meira >