Hjálmar Jónsson er önnum kafinn þessa dagana við að kynna bók sína Hjartslátt. Viðtökur lesenda og gagnrýnenda hafa enda verið frábærar. Fyrsta prentun bókarinnar er á þrotum, ævisaga Hjálmars fékk fjórar stjörnur á Pressunni og Hrafn Jökulsson lýsti mikilli hrifningu sinni í Viðskiptablaðinu. Hjálmar var á Sauðárkróki í gær, kemur víða fram á Höfuðborgarsvæðinu í dag og á morgun, heldur aftur norður í Skagafjörð á laugardag og verður svo á Akureyri á sunnudag. Sannarlega í nógu að snúast hjá metsöluhöfundi og klerki núna fyrir jólin! meira >

Horfðu á mig eftir Yrsu Sigurðardóttur stekkur beint í fjórða sæti skáldverkalista Eymundssonar sem birtur er í dag og situr þar að auki í sjötta sæti aðallistans. Umsátrið eftir Styrmi Gunnarsson er fjórða mest selda bókin í flokki handbóka, fræðibóka og ævisagna og situr í tíunda sæti aðallistans. Hins vegar er Hjartsláttur séra Hjálmars Jónssonar uppseldur en ný prentun er væntanleg fyrir helgi. Þá er ekki ónýtt að sjá tvær bækur frá stóra bróður Veraldar, Bjarti, á aðallista Eymundssonar en þar fara kappar tveir, Stieg Larsson með Loftkastalann sem hrundi í þriðja sæti og Dan Brown með Týnda táknið í því áttunda. Harmur englanna eftir Jón Kalman er í sjöunda sæti skáldverkalistans, Góði elskhuginn eftir Steinunni Sigurðardóttur í því tíunda og Færeyskur dansur Huldars Breiðfjörð í því tólfta.

meira >

"Ég fann það eftir fyrstu síðurnar að þessi bók yrði lesin í einum rykk," segir Bergur Ebbi Benediktsson á www.midjan.is um Falska nótu eftir Ragnar Jónasson. Hann heldur síðan áfram: "Sú tilfinning er góð og ber vott um að strax á fyrstu síðum takist höfundi að vekja upp það mikla forvitni að maður verði að vita lausn gátunnar innan nokkura klukkustunda. Það þýðir ekki að bíða til morguns." Hann líkir lestri bókarinnar við rússíbanareið í myrkri þar sem lesandinn situr í öruggum höndum höfundarins.

 

Á dögunum sagði Hrafn Jökulsson, einn beittasti gagnrýnandi landsins, að Ragnar gefi ágæt fyrirheit með þessari bók. Hann sýni að hann kunni að flétta söguþráð og byggja sögu, og því sé full ástæða til að gefa honum gaum í framtíðinni. Fléttan sé haganlega gerð, höfundurinn valhoppi fram og aftur í tíma og rúmi, og takist ágætlega upp. Sagan sé prýðilega uppbyggð og um margt lagleg frumraun.

 

meira >

Kristín G. Guðnadóttir er tilnefnd til Íslensku bókmenntaverðlaunanna fyrir stórvirki sitt um Svavar Guðnason. Þetta var upplýst við hátíðlega athöfn í Listasafni Íslands í dag. Meðal annarra bóka sem hlutu tilnefningu í flokki bóka almenns efnis var Mynd af Ragnari í Smára eftir Jón Karl Helgason. Þá var skáldsagan Góði elskhuginn eftir Steinunni Sigurðardóttur tilnefnd í flokki fagurbókmennta. Veröld óskar þeim innilega til hamingju með verðskuldaða viðurkenningu.

 

Bók Kristínar um Svavar Guðnason hefur vakið mikla hrifningu en Páll Baldvin Baldvinsson sagði í Kiljunni að þetta væri hvorki meira né minna en "tímamótaverk í rannsóknum á íslenskri myndlistarsögu." Egill Helgason var á sama máli og fannst þetta "ótrúlega glæsilegt verk".

meira >

Yrsa Sigurðardóttir hefur nú sent frá sér sína bestu bók, að mati Úlfhildar Dagsdóttur. Umsátrið eftir Styrmi Gunnarsson fer af stað með miklum látum og hefur skekið samfélagið undanfarna daga. Fjögurra stjörnu ævisaga Hjálmars Jónssonar selst í bílförmum um land allt. Menn hafa fagnað af minna tilefni og því drögum við út þrjá heppna af póstlista Veraldar sem geta vitjað vinninga sinna á Bræðraborgarstíg 9.

Netföng þeirra eru:

lolo@fjarhitun.is sem hlýtur Horfðu á mig eftir Yrsu Sigurðardóttur

bibs@simnet.is sem hlýtur Umsátrið eftir Styrmi Gunnarsson

svanurmg@mi.is sem hlýtur Hjartslátt séra Hjálmars

 

meira >

Horfðu á mig er áhrifamikil og skemmtileg glæpasaga "sem er án efa besta bók Yrsu til þessa," segir Úlfhildur Dagsdóttir í gagnrýni sinni á www.bokmenntir.is. Úlfhildur segir að glæpasögur Yrsu hafi "frá upphafi einkennst af því sem kalla mætti samslætti hins forneskjulega, í formi hins yfirnáttúrulega, og hins nútímalega, en sögurnar gerast allar í samtímanum. Yrsa er sú eina af íslenskum glæpahöfundum sem hefur markvisst notað sér þjóðsagnaarf til að gæða sögur sínar dálitlum aukahryllingi og að því leyti standa sögur hennar nærri hrollvekjunni." Þetta er fyrsti dómurinn sem birtist um þessa nýjustu glæpasögu Yrsu en salan á henni hefur farið betur af stað en á nokkurri fyrri bóka hennar. meira >

Hið íslenska glæpafélag efnir til Glæpakvölds á Grand Rokki við Smiðjustíg í kvöld klukkan 20.30. Meðal höfunda sem lesa eru Yrsa Sigurðardóttir, Ragnar Jónasson og Lilja Sigurðardóttir. Yrsa sendi frá sér sína fimmtu glæpasögu í vikunni og nefnist hún Horfðu á mig. Fölsk nóta eftir Ragnar Jónasson kom út núna í október og er hún frumraun hans á rithöfundasviðinu. Sama máli gegnir um Lilju Sigurðardóttur en Spor er fyrsta glæpasaga hennar. meira >

Umsátrið eftir Styrmi Gunnarsson er fjórða mest selda bók landsins samkvæmt metsölulista Eymundssonar sem birtur er í dag. Hjálmar Jónsson situr í níunda sæti aðallistans með ævisögu sína Hjartslátt. Þá vekur sérstaka athygli að Horfðu á mig eftir Yrsu Sigurðardóttur er í níunda sæti yfir innbundin skáldverk en bókin kom út síðasta daginn sem salan var mæld. Það má því fastlega gera ráð fyrir því að Yrsa verði enn á ný með eina af mest seldu bókum jólavertíðarinnar. Bók Styrmis hefur vakið fádæma athygli og er um fátt meira rætt en uppljóstranir hans í bókinni. Þá hefur Hjálmar fengið frábæra dóma fyrir ævisögu sína. meira >

Í dag kemur út fimmta glæpasaga Yrsu Sigurðardóttur og nefnist hún Horfðu á mig. Fyrsta upplag bókarinnar er 10.000 eintök, hvorki meira né minna! Þóra Guðmundsdóttir lögmaður reynir að fá endurupptekið mál fatlaðs manns sem vistaður er á réttargeðdeildinni á Sogni fyrir að kveikja í sambýli með skelfilegum afleiðingum. Ungum útvarpsmanni berast torkennileg skilaboð og ógnvekjandi símtöl. Og látin stúlka sækir í að standa við fyrirheit um að passa lítinn dreng. Saman fléttast þessir þræðir í glæpasögu sem fær hárin til að rísa.

 

Gagnrýnendur heimspressunnar hafa á liðnum árum hlaðið Yrsu Sigurðardóttur lofi og sagt að hún sé tvímælalaust í hópi fremstu glæpasagnahöfunda Norðurlanda (The Times); Þóra er uppáhalds kvenspæjari annars (Guardian) og "það er ekki oft sem maður rekst á glæpasögu sem er hvorttveggja í senn hrollvekjandi og fyndin - og það er sannarlega ánægjuleg blanda." (Spectator).

meira >

Í dag kemur Horfðu á mig eftir Yrsu Sigurðaróttur út og er fyrsta prentun 10.000 eintök. Þegar við bætist að þjóðfélagið er að fara á annan endann út af nýjum upplýsingum í bók Styrmis Gunnarssonar, Umsátrinu, og Hjartsláttur séra Hjálmars verður hraðari og hraðari - ef miða á við fjölda bók sem fer af lager - þá er full ástæða til að fagna. Við höfum dregið út þrjú netföng af póstlista Veraldar. Hinir heppnu geta nálgast vinningana hjá Veröld á Bræðraborgarstíg 9 en þeir eru:

eirikurh@islandia.is sem fær Umsátrið eftir Styrmi Gunnarsson

elfa@fsa.is sem fær Horfðu á mig eftir Yrsu Sigurðardóttur

asdisester@centrum.is sem fær Hjartslátt eftir Hjálmar Jónsson

meira >