"Kláraði ferðabók Runólfs Ágústssonar um Ástralíu um helgina, Enginn ræður för," segir Ragnar Jónasson rithöfundur, þýðandi og lögfræðingur á Fésbókinni. "Frábærlega skemmtileg ferðasaga, í hvert skipti sem ég opnaði bókina leið mér eins og ég væri kominn til Ástralíu; og fram undir lokin langaði mig líka til þess að heimsækja þetta spennandi land, alveg þangað til kom að kaflanum um baneitruð skordýr, skriðdýr og sjávardýr!" Á dögunum hældi Einar Falur Ingólfsson Runólfi í hástert fyrir bókina og gaf honum þrjár stjörnur. meira >

Felix Film í Stokkhólmi hefur gert tilboð í kvikmyndaréttinn á tveimur skáldsögum Sindra Freyssonar, Flóttanum og Dóttur mæðra minna sem er nýkomin út hjá Veröld. Viðræður eru nú á lokastigi og er reiknað með að gengið verði endanlega frá samningum á næstunni. Felix Film er í eigu kvikmyndagerðarmannanna Helga Felixsonar og Titti Johnson og hefur um árabil framleitt heimildarmyndir frá öllum heimshornum, sem fengið hafa fjölda verðlauna og mikið lof. Nýjasta mynd Helga, Guð blessi Ísland, um hrunið og afleiðingar þess, hefur vakið mikla athygli og umtal og verður sýnd í mörgum helstu sjónvarpsstöðvum Evrópu. Flóttinn og Dóttir mæðra minna yrðu hins vegar fyrstu leiknu verkefni Felix Film og miklu meiri að umfangi en fyrri myndir þeirra.

 

Flóttinn segir frá ævintýralegum flótta Þjóðverja á stríðsárunum á Íslandi, en hann fór huldu höfði á Vestfjörðum um eins árs skeið með hjálp heimamanna og var ákaft leitað af Bretum. Dóttir mæðra minna segir frá afdrifum sjö Ísfirðinga sem Bretar handtóku sumarið 1941 og fluttu nauðuga til Englands. Þau voru lokuð inni í breskum fangelsum, karlarnir í Brixton-fangelsinu og konurnar í Holloway, þar sem þeirra beið að dúsa um óvissa tíð. Aðalpersóna Dóttur mæðra minna er Kristín Eva, sautján ára stúlka, sem upplifir þessa örlagaríku atburði og reynir að lifa þá af með öllum ráðum.

 

Gagnrýnendur hafa hælt bókinni í hástert; "stór bók um mikil örlög," sagði í Víðsjá og hálf fjórða stjarna á Pressunni.

 

 

meira >

Bókin Svavar Guðnason eftir Kristínu G. Guðnadóttur er "glæsileg stórbók" að máti Páls Baldvins Baldvinssonar, menningarritstjóra Fréttablaðsins. "Svavar Guðnason var í hópi fremstu listamanna Evrópu eftirstríðsáranna," skrifar Páll Baldvin og bætir við: "Hann er tvímælalaust sá myndlistarmaður þjóðarinnar sem mesta athygli hefur vakið erlendis auk þess að vera brautryðjandi í íslenskri myndlist. ... Í glæsilegri bók Kristínar G. Guðnadóttur um Svavar Guðnason er mikilfenglegur ferill hans skoðaður og settur í sögulegt samhengi við íslenska og evrópska myndlist og myndir birtar af fjölmörgum verka hans, þar sem kannski er fólginn "hinn hreini sannleiki litanna", eins og Halldór Laxness ritaði. Þá er einnig fjallað um lífshlaup Svavars og persónulega hagi. Bókin er stórgripur og sætir viðlíka tíðindum og verk sama höfundar, Kristínar G. Guðnadóttur listfræðings, og annarra um feril Jóhannesar Sveinssonar Kjarvals sem kom út fyrir fáum árum. Hefur Kristín unnið að rannsókn sinni á ferli og verkum Svavars um árabil." meira >

"Þetta er forvitnileg frásögn og persónuleg, því ferðin hjálpaði höfundinum að skilja hver hann er, og fyrir hvað hann lifir. Og þá er ekki til lítils unnið," segir Einar Falur Ingólfsson í umsögn um reisubók Runólfs Ágústssonar, Enginn ræður för, í Morgunblaðinu í dag. Hann skenkir bókinni þrjár stjörnur og er hinn ánægðasti. Hann segir að áhugaverðasti hluti bókarinnar fjalli um það þegar Runólfur leitar ummerkja um Jörund hundadagakonung á Tasmaníu, finnur gröf hans auk annarra viðkomustaða. "Þetta er býsna vel gert."

 

Runólfur Ágústsson hafði verið atkvæðamikill rektor á Bifröst og frumkvöðull í að byggja upp nýtt háskólasamfélag á gamla varnarsvæðinu í Keflavík. Nú var komið að skuldadögum. Ef hann ætlaði sér að ná líkamlegri heilsu og andlegu jafnvægi yrði hann að snúa blaðinu við og breyta lífi sínu. Þá hefur ýmsum reynst vel að halda út í eyðimörkina.

 

Reisubók Runólfs Ágústssonar er einlæg, áleitin og bráðfyndin lesning, uppfull af fróðleik um framandi slóðir. Þetta er heillandi frásögn manns sem fór yfir hálfan hnöttinn og fann þar fyrir sjálfan sig.

meira >

"Svo skal dansa - Skáldsaga úr veruleikanum er assvíti fín skáldsaga," segir Ólafur Guðsteinn Kristjánsson um bók Bjarna Harðarsonar í Mogganum í dag og gefur henni þrjár og hálfa stjörnu, hvorki meira né minna. Honum finnst orðalagið sem brúkað er endurspegla vel sögutímann og gefa frásögninni sannferðugan blæ. Hann segir að bókin eigi sannarlega erindi við lífsgæðabrennda Íslendinga og lýkur umsögn sinni með þessum orðum: "Þetta er bók sem hreinlega lyktar af sögu."

 

Áður hefur bók Bjarna fengið fjórar stjörnur í Fréttablaðinu þar sem sagði að þetta væri "heillandi bók" og  gagnrýnandi Pressunnar skrifaði: "Saga þessara íslensku alþýðukvenna lætur vart nokkurn, sem hana les, ósnortinn."

meira >

Ný glæpasaga Yrsu Sigurðardóttur, Horfðu á mig, kemur út eftir helgi. Þóra Guðmundsdóttir lögmaður reynir að fá upptekið mál fatlaðs manns sem vistaður er á réttargeðdeildinni á Sogni fyrir að kveikja í sambýli með skelfilegum afleiðingum. Ungum útvarpsmanni berast torkennileg skilaboð og ógnvekjandi símtöl. Og látin stúlka sækir í að standa við fyrirheit um að passa lítinn dreng. Saman fléttast þessir þræðir í glæpasögu sem fá hárin til að rísa. Kveikja bókarinnar var fyrsta særing sem þjóðkirkjan framkvæmdi í heila öld.

meira >

Svavar Guðnason eftir Kristínu G. Guðnadóttur er mesta stórvirki Veraldarsögunnar og Umsátrið - Fall Íslands og endurreisn eftir Styrmi Gunnarsson hefur vakið þjóðarathygli - áður en hún kemur út. Þá hefur Hjartsláttur, ævisaga séra Hjálmars Jónssonar slegið rækilega í gegn - fengið frábæra dóma og mælst griðarlega vel fyrir meðal lesenda. Af því tilefni drögum við út þrjá heppna af póstlista Veraldar og fá þeir hver sína bókina. Hinir heppnu eru eftirtaldir:

hevai@visir.is hlýtur Svavar Guðnason eftir Kristínu G. Guðnadóttur

gv@brimhf.is hlýtur Hjartslátt eftir Hjálmar Jónsson

tandbjo@verslo.is hlýtur Umsátrið eftir Styrmi Gunnarsson

meira >

Óhætt er að segja að samfélagið nötri vegna útkomu bókar Styrmis Gunnarssonar, Umsátrið - Fall Íslands og endurreisn. Morgunblaðið birti á forsíðu á miðvikudag frétt um að hugsanlega yrðu ráðherrar dregnir fyrir Landsdóm, Fréttablaðið skúbbaði því að lokun Landsbankans hefði vofað yfir í ágúst 2008, fréttastofa Stöðvar 2 greindi frá því að haldinn hefði verið neyðarfundur heima hjá Davíð Oddssyni seðlabankastjóra í lok mars 2006 vegna yfirvofandi falls íslensku bankanna og Pressan sagði frá því að Íslendingar hefðu hætt þátttöku í norrænni prófun þegar einn íslenskur banki var settur í vandræði og spurt um viðbrögð íslenska ríkisins. Þá fjallaði Stöð 2 ýtarlega um "koss dauðans", sem Styrmir segir frá. Svo fátt eitt sé nefnt. Það er því ljóst að Umsátrið kemur eins og sprengja inn í íslenska þjóðfélagsumræðu. meira >

Í dag, 18. nóvember, eru 100 ár liðin frá fæðingu Svavars Guðnasonar listmálara. Af því tilefni kemur út hjá bókaforlaginu Veröld stórvirkið Svavar Guðnason eftir Kristínu G. Guðnadóttir listfræðing. Svavar Guðnason var í hópi fremstu listamanna Evrópu eftirstríðsáranna. Hann er tvímælalaust sá myndlistarmaður þjóðarinnar sem mesta athygli hefur vakið erlendis auk þess að vera brautryðjandi í íslenskri myndlist.

 

 

Í glæsilegri bók Kristínar G. Guðnadóttur um Svavar Guðnason er mikilfenglegur ferill Svavars skoðaður og settur í sögulegt samhengi við íslenska og evrópska myndlist og myndir birtar af fjölmörgum verka hans, þar sem kannski er fólginn „hinn hreini sannleiki litanna“, eins og Halldór Laxness ritaði. Þá er einnig fjallað um lífshlaup Svavars og persónulega hagi. Svavar Guðnason er veglegur minnisvarði um einn merkasta fulltrúa íslenskrar menningar fyrr og síðar.

 

meira >

Hanna G. Sigurðardóttir fékk Kolbrúnu S. Ingólfsdóttur í viðtal í þátt sinn Vítt og breitt á Rás 1 í morgun í tilefni af útkomu bókar hennar Merkiskonur sögunnar. Þær ræddu efni bókarinnar og kvenskörunga fyrri tíðar en viðtalið má heyra hér.

 

Mannkynssagan hefur aðallega snúist um Evrópu og einkum og sér í lagi karlmenn. Í þessari stórfróðlegu bók er fjallað um 33 konur í veraldar- og Íslandssögunni sem settu mark á samtíð sína – og þar með söguna – og létu ekki hlut sinn svo auðveldlega þegar kom að breytingum og völdum.

 

Sumar af söguhetjum þessarar bókar eru vel þekktar, svo sem Kleópatra, sem var síðasti faraóinn, og Elísabet I. sem lagði grunninn að heimsveldi Breta. Færri hafa vitað um konur á borð við Hatsepút, fyrstu konuna sem ríkti sem þjóðhöfðingi í Egyptalandi, og Yehonölu keisaraynju, en hún er ein valdamesta konan í sögu Kína.

 

Í bók Kolbrúnar segir frá merkiskonum sögunnar frá örófi alda til loka 19. aldar er tími hinnar eiginlegu kvennabaráttu gekk í garð. Kolbrún Ingólfsdóttir bregður hér lifandi ljósi á kvenskörunga fyrri tíðar í áhugaverðri bók sem á brýnt erindi við konur á öllum aldri.

meira >