Dóttir mæðra minna eftir Sindra Freysson er "stór bók um mikil örlög", sagði Auður Aðalsteinsdóttir, gagnrýnandi Víðsjár í Ríkisútvarpinu í gær. Bókin er "skemmtileg aflestrar og höfundur heldur manni við efnið allan tímann. ... Kristín Eva kemur á óvart út alla bókina, er alls ekki öll þar sem hún er séð," sagði Auður og bætti við að Sindra hefði tekist "að skapa afskaplega bitastæða skáldsögu." Hún sagði enn fremur að margar lýsingar væru þannig að þær hreinlega lifnuðu við líkt og kvikmynd í huga lesandans. Hún er þannig sammála Jóni Yngva Jóhannssyni en hann sagði að Dóttir mæðra minna væri "áhrifamikil örlagasaga og flottur og þroskaður skáldskapur. Hún lýsir þroska ungrar konu sem kemur breytt og sterk út úr nær óbærilegum aðstæðum á sannfærandi hátt." Og gaf henni hálfa fjórðu stjörnu. Hér má síðan sjá skáldsögu Sindra á einni mínútu og fimmtán sekúndum í túlkun Jóns Egils Bergþórssonar.

meira >

Bók Styrmis Gunnarssonar, Umsátrið - Fall Íslands og endurreisn, kemur út á föstudag. Eftirvænting lesenda er mikil, enda er hér um að ræða einstakt verk um það sem gerðist á bak við tjöldin í aðdraganda þess að Ísland hrundi.

meira >

Dóttir mæðra minna eftir Sindra Freysson hefur vakið verðskuldaða athygli í jólabókaflóðinu. Sagan er "hvort tveggja í senn, áhrifamikil örlagasaga og flottur og þroskaður skáldskapur. Hún lýsir þroska ungrar konu sem kemur breytt og sterk út úr nær óbærilegum aðstæðum á sannfærandi hátt," sagði Jón Yngvi Jóhannsson í dómi um bókina á Pressunni og gaf Dóttur mæðra minna þrjár og hálfa stjörnu. Myndband Jóns Egils Bergþórssonar kvikmyndagerðarmanns upp úr bókinni á ekki síður hrós skilið en það getur að líta hér. Þarna dunar dansinn á Ísafirði við hernám Íslands, skipin ösla úfinn sjó til Englands, London brennur - og sautján ára stúlka dúsir í Holloway-fangelsi þar í borg og veit ekki hvort eða hvenær hún mun losna. Sannarlega magnað myndband við stórbrotna sögu – heil skáldsaga á einni mínútu og fimmtán sekúndum!

 

 

meira >

"Saga þessara íslensku alþýðukvenna lætur vart nokkurn, sem hana les, ósnortinn. Þetta er örlagasaga, sem dregur upp mynd af átakanlegu hlutskipti íslenskrar alþýðu, og þá sérstaklega kvenna, allt fram yfir miðja 20. öld," segir Ólafur Arnarson, gagnrýnandi Pressunnar, um skáldsögu Bjarna Harðarsonar, Svo skal dansa. Þar rekur Bjarni sögu formæðra sinna frá síðari hluta 19. aldar og langt fram eftir þeirri 20. Allar áttu þær það sammerkt að þurfa að gefa frá sér börn. Ólafur gefur Bjarna þrjár stjörnur af fjórum mögulegum og er þar á svipuðum slóðum og gagnrýnandi Fréttablaðsins, Kolbeinn Óttarsson Proppé, sem skenkti bókinni fjórar stjörnur af fimm og sagði þetta "heillandi bók."

meira >

Er kápan á Umsátrinu, bók Styrmis Gunnarssonar, kápa ársins?  Þannig er spurt á kaffistofu Pressunnar og sagt að ekki sé hægt að túlka fall Íslands betur en gert sé á kápu Ragnars Helga Ólafssonar. "En bókarinnar er beðið með eftirvæntingu á kaffistofunni sem víða annars staðar..." segir á Pressunni. meira >

Hjálmar Jónsson er "með skemmtilegri mönnum eins og endurminningar hans eru til vitnis um," segir Hrafn Jökulsson í dómi um ævisögu hans, Hjartslátt, í Viðskiptablaðinu og bætir við: "Þá er hann pennfær í betra lagi, hjartahlýr og elskulegur, svo úr verður hin ágætasta bók." Þarna er Hrafn á svipuðum slóðum og gagnrýnandi Pressunnar, Hanna Brynhildur Jónsdóttir, sem gaf ævisögu séra Hjálmars fjórar stjörnur, hvorki meira né minna, og mælti hiklaust með bókinni við fólk á öllum aldri.

 

Í lok umsagnar sinnar skrifar Hrafn: "Það er ánægjulegt einkenni á frásögn séra Hjálmars hve umtalsgóður og jákvæður hann er. Að auki hefur hann næmt auga fyrir hinu spaugilega og bókin er ríkulega krydduð kveðskap, enda séra Hjálmar einhver besti vísnasmiður landsins."

meira >

Umsátrið - Fall Íslands og endurreisn eftir Styrmi Gunnarsson, fyrrverandi ritstjóra Morgunblaðsins, er nú á lokametrunum í Prentsmiðjunni Odda. Hún er væntanleg í síðari hluta vikunnar og er óhætt að segja að eftirvæntingin sé mikil.

 

 

Í þessari einstöku bók varpar Styrmir nýju ljósi á fall Íslands og aðdraganda þess. Hann rekur atburðarásina sem leiddi til gjaldþrots bankanna þar sem fjölmargt nýtt og óvænt kemur í ljós. Hér segir frá dramatískum neyðarfundum sem haldnir voru fjarri kastljósi fjölmiðla, sögulegum símtölum, sviptingum á bak við tjöldin í heimi stjórnmála og banka og ómótstæðilegum tilboðum um “koss dauðans”. Þá fjallar hann um það hvernig eigi að reisa Ísland aftur við og byggja það upp til framtíðar.

 

 

Styrmir Gunnarsson hefur um áratuga skeið haft beinan aðgang að ráðamönnum í stjórnmálum og atvinnulífi. Hann styðst einnig við fjölmörg óbirt gögn sem hvergi hefur verið vitnað til áður. Þá eru í bókinni stórmerkilegar upplýsingar úr innsta hring um tildrög þess að Ísland hrundi. Umsátrið er ómissandi fyrir alla þá sem vilja komast að því hvað gerðist á bak við tjöldin á einum mestu örlagatímum Íslandssögunnar.

 

meira >

Í lok næstu viku er von á bók Styrmis Gunnarssonar, Umsátrið - Fall Íslands og endurreisn, og glæpaögu Yrsu Sigurðardóttur, Horfðu á mig, úr Prentsmiðjunni Odda. Vegna ítrekaðra fyrirspurna skal tekið fram að Oddaverjar sverja og sárt við leggja að þeir muni gera allt sem í mannlegu valdi stendur til að tryggja að bækurnar verði komnar á markað fyrir næstu helgi.

 

Marteinn Jónasson, yfirmaður stórviðskipta, Björn Svanur Víðisson viðskiptastjóri á risaupplagasviði og Díana Sigurfinnsdóttir aðalforstöðumaður prentráðgjafasviðs hafa öll staðfest þetta í samtölum við tíðindamenn Veraldarvefjarins. Þá mun Marteinn sjálfur persónulega hafa smurt vélarnar svo ekkert færi úrskeiðis en hann tekur líka fram að það sé hægara sagt en gert að koma tíu þúsund eintökum af bók Yrsu í gegnum prentverkið, enda fátítt að svo stórt upplag sé prentað hér á landi. Þá sé upplagið á bók Styrmis í stærra lagi - en viðráðanlegt. Bjarni Þorsteinsson útgáfustjóri Veraldar segir að hann hafi aldrei reynt Oddaverja að því að ganga á bak orða sinna og því trúi hann ekki öðru en að báðir titlar verði komnir í hús fyrir aðra helgi.

meira >

"Hjartsláttur einkennist af mjög svo skemmtilegum frásögnum úr lífi séra Hjálmars og eru þær líflegar og glettnin aldrei langt undan. Hún er afar vel skrifuð, hvorki of stutt né of löng og stundum var hreinlega erfitt að leggja hana frá sér, svo skemmtileg var hún," segir Hanna Brynhildur Jónsdóttir, gagnrýnandi Pressunnar, í dómi um ævisögu séra Hjálmars Jónssonar. Hún mælir "hiklaust með þessari bók fyrir fólk á öllum aldri" og gefur henni fjórar stjörnur. Það er því óhætt að segja að klerkur taki bókamarkaðinn með trompi því að ævisaga hans fór beint í efsta sæti metsölulista Bókabúðar Máls og menningar í liðinni viku - daginn eftir útgáfudag - og fær nú fjórar stjörnur hjá gagnrýnanda Pressunnar.

 

Hjálmar er eftirsóttur upplesari nú fyrir jólin og er um þessar mundir á mikilli yfirreið yfir landið, má þar nefna að hann var á Blönduósi um helgina og Akranesi í gær. Dóm Hönnu Brynhildar má lesa í heild sinni hér.

meira >

Hjartsláttur séra Hjálmars Jónssonar er mest selda bókin í Bókabúð Máls og menningar samkvæmt metsölulista verslunarinnar sem birtur er í dag. Í öðru sæti eru Svörtuloft Arnaldar Indriðasonar. Árangur Hjálmars er þeim mun athyglisverðari þegar á það er litið að bókin kom út síðasta daginn sem salan var mæld. Það má því fastlega reikna með Hjartslætti í toppbaráttunni á metsölulistum ársins.

 

Hjálmar hefur lifað dramatísku lífi. Bernska hans í Biskupstungum og Eyjafirði var full af andstæðum; þar voru bæði einstæðingar á örreitiskotum og skrautleg athafnaskáld, faðir hans flugkappi menntaður vestur í Ameríku en móðir hans sveitastúlka sem undi sér hvergi betur en í túninu heima. Vinnubrögðin voru eins og aftan úr fornöld en síðan var þeim kippt inn í vélvæðingu nútímans.

Hjálmar lýsir í ævisögu sinni, sem nefnist Hjartsláttur, glímunni við Guð, prestskap í Húnavatnssýslu, Skagafirði og í Reykjavík, fjallar um eftirminnileg ár á Alþingi og segir frá ýmsu sem þar gerðist að tjaldabaki. Þá greinir hann frá tildrögum þess að hann sagði skilið við stjórnmálin og gerðist dómkirkjuprestur. Og að sjálfsögðu fylgir með ógrynni af landsfrægum vísum hans.

Saga Hjálmars Jónssonar er full af húmor og gleði en hann hefur líka kynnst myrkari hliðum tilverunnar, bæði í lífi og starfi. Hrífandi bók sem vekur lesandann til umhugsunar um hinstu rök tilverunnar – en kveikir líka bros.

 

meira >