"Dóttir mæðra minna er hvort tveggja í senn, áhrifamikil örlagasaga og flottur og þroskaður skáldskapur. Hún lýsir þroska ungrar konu sem kemur breytt og sterk út úr nær óbærilegum aðstæðum á sannfærandi hátt," segir Jón Yngvi Jóhannsson í dómi um Dóttir mæðra minna eftir Sindra Freysson á Pressunni. Hann gefur bókinni hálfa fjórðu stjörnu. Jón Yngvi er afar hrifinn af sögumanni bókarinnar og segir: "Kristín Eva er heillandi sögumaður, hún setur sig óhikað í spor mæðra sinna, og í gegnum sögur þeirra og eigin reynslu ljúkast henni upp nýir heimar.  Þótt hún sé kotroskin og stundum háfleyg sem sögumaður er hún líka sautján ára og forvitin um þann fullorðinsheim sem hún hefur þegar fengið forsmekkinn af." meira >

Einn beittasti gagnrýnandi landsins, Hrafn Jökulsson, gefur Ragnari Jónassyni fína umsögn í Viðskiptablaðinu í dag. Hann segir að Ragnar gefi ágæt fyrirheit með þessari bók. Hann sýni að hann kunni að flétta söguþráð og byggja sögu, og því sé full ástæða til að gefa honum gaum í framtíðinni. Fléttan sé haganlega gerð, höfundurinn valhoppi fram og aftur í tíma og rúmi, og takist ágætlega upp. Sagan sé prýðilega uppbyggð og um margt lagleg frumraun.

meira >

Nú streyma bækurnar á markað hjá Veröld. Ævisaga Hjálmars Jónssonar kemur út á morgun, fimmtudag, Merkiskonur sögunnar eftir Kolbrúnu S. Ingólfsdóttur fer í verslanir í dag, skáldsögur Bjarna Harðarsonar, Svo skal dansa, og Sindra Freyssonar, Dóttir mæðra minna, hafa mælst frábærlega fyrir og glæpasaga Ragnars Jónassonar er "ágætis byrjun" eins og gagnrýnandi komst að orði og vísaði þar í Sigur Rós. Menn hafa dregið út ánægða vinningshafa af minna tilefni. Þrír heppnir fá bók að gjöf og eru netföng þeirra eftirfarandi:

 

olinak@vortex.is hlýtur Hjartslátt séra Hjálmas Jónssonar

romana@nett.is fær Merkiskonur sögunnar eftir Kolbrúnu S. Ingólfsdóttur

sigr@simnet.is fær Svo skal dansa eftir Bjarna Harðarson

 

Hinir heppnu geta vitjað vinninganna í höfuðstöðvum Veraldar að Bræðraborgarstíg 9 í Reykjavík.

meira >

Á morgun, fimmtudaginn 5. nóvember, fögnum útgáfu ævisögu Hjálmars Jónssonar í Bókabúð Máls og menningar, Laugavegi 18 kl. 17.00. Hjálmar hefur lifað dramatísku lífi. Bernska hans í Biskupstungum og Eyjafirði var full af andstæðum; þar voru bæði einstæðingar á örreitiskotum og skrautleg athafnaskáld, faðir hans flugkappi menntaður vestur í Ameríku en móðir hans sveitastúlka sem undi sér hvergi betur en í túninu heima. Vinnubrögðin voru eins og aftan úr fornöld en síðan var þeim kippt inn í vélvæðingu nútímans.

Hjálmar lýsir í ævisögu sinni, sem nefnist Hjartsláttur, glímunni við Guð, prestskap í Húnavatnssýslu, Skagafirði og í Reykjavík, fjallar um eftirminnileg ár á Alþingi og segir frá ýmsu sem þar gerðist að tjaldabaki. Þá greinir hann frá tildrögum þess að hann sagði skilið við stjórnmálin og gerðist dómkirkjuprestur. Og að sjálfsögðu fylgir með ógrynni af landsfrægum vísum hans.

Saga Hjálmars Jónssonar er full af húmor og gleði en hann hefur líka kynnst myrkari hliðum tilverunnar, bæði í lífi og starfi. Hrífandi bók sem vekur lesandann til umhugsunar um hinstu rök tilverunnar – en kveikir líka bros.

 

Útgáfufagnaðurinn er öllum opinn og hefst, eins og áður segir, kl. 17 á morgun, fimmtudag.

meira >

Bókaforlagið Veröld hefur gefið út bókina Merkiskonur sögunnar eftir Kolbrúnu S. Ingólfsdóttur. Mannkynssagan hefur aðallega snúist um Evrópu og einkum og sér í lagi karlmenn. Í þessari stórfróðlegu bók er fjallað um 33 konur í veraldar- og Íslandssögunni sem settu mark á samtíð sína – og þar með söguna – og létu ekki hlut sinn svo auðveldlega þegar kom að breytingum og völdum.

Sumar af söguhetjum þessarar bókar eru vel þekktar, svo sem Kleópatra, sem var síðasti faraóinn, og Elísabet I. sem lagði grunninn að heimsveldi Breta. Færri hafa vitað um konur á borð við Hatsepút, fyrstu konuna sem ríkti sem þjóðhöfðingi í Egyptalandi, og Yehonölu keisaraynju, en hún er ein valdamesta konan í sögu Kína.

Hér segir frá merkiskonum sögunnar frá örófi alda til loka 19. aldar er tími hinnar eiginlegu kvennabaráttu gekk í garð. Kolbrún Ingólfsdóttir bregður hér lifandi ljósi á kvenskörunga fyrri tíðar í áhugaverðri bók sem á brýnt erindi við konur á öllum aldri.
meira >

"Ekki skal ég endilega segja um hvort bækur Ragnars Jónassonar muni ná álíka æstum vinsældum [og Ágætis byrjun Sigur Rósar], en fyrsta glæpasaga hans, Fölsk nóta, er sannarlega ágætis byrjun og það er erfitt að forðast frasann að hér hafi bæst við nýr tónn í íslenska spennusagnaflóru," segir Úlfhildur Dagsdóttir í umsögn sinni á www.bokmenntir.is. Hún ritar enn fremur: "sagan er skemmtileg aflestrar, flakk fram og til baka í tíma gerir sig vel og sú mynd sem er dregin upp af fremur einmana ungum manni er áhugaverð og skýr; hér er ekki farin sú leið að velta sér uppúr ýktum tilfinningum heldur er áherslan á að sýna hvernig áfall sem munaðarleysið og dularfullt hvarf föðurins hefur í för með sér, hefur áhrif á einstakling og tilveru hans" og bætir við að sagan sverji sig í ætt við fyrri bækur Agöthu Christie "sem eru einmitt að stórum hluta til persónustúdíur - og gefa sér að allir hafi alltaf eitthvað að fela." Kannski það viðri vel til loftárása hjá Ragnari þessa dagana, eins og hjá Sigur Rós? meira >

"Eiríkur Bergmann hefur tekið saman þarfa og upplýsandi bók. Texti hans er lipur, gagnorður og jafnvel skemmtilegur, sem verður að teljast nokkurt afrek," segir Hrafn Jökulsson í ýtarlegum dómi um bók hans Frá Evróvisjón til Evru í Viðskiptablaðinu í dag. Hann ritar að Eiríkur gjörþekki umfjöllunarefnið og hafi lengi verið ötull talsmaður aðildar Íslands að Evrópusambandinu. "Bók hans er hinsvegar ekkert trúðboðsrit, heldur mjög gagnlegt og um margt stórfróðlegt yfirlit um sögu Evrópusambandsins og þróun á gangvirki sem verður stöðugt flóknara eftir því sem aðildarríkjum fjölgar." Hrafn segir að bók Eiríks sé virðingarvert innlegg í umræðuna um Evrópumál, tiltekur sérstaklega kafla um sjávarútveg og landbúnað og lýkur umsögn sinni með þeim orðum að Eiríkur eigi "hrós skilið fyrir upplýsandi og greinargóða samantekt um það fyrirbæri sem allir verða að kynna sér, hvort sem okkur líkar það betur eða verr." meira >

Bókaforlagið Veröld hefur gefið út skáldsöguna Dóttir mæðra minna eftir Sindra Freysson.
Dansinn dunar á Ísafirði þegar hermenn með alvæpni ganga þar á land á bjartri sumarnótt árið 1941. Þeir stilla upp vélbyssum og handtaka sjö heimamenn. Þeirra á meðal er Kristín Eva, 17 ára stúlka, og móðir hennar. Síðar um nóttina eru þær fluttar ásamt hinum föngunum til stríðshrjáðs Englands, sakaðar um að vera óvinir ríkisins.

Þar bíður þeirra fangelsi um óvissa tíð. Í prísundinni spinnur Kristín Eva áhrifamikla og átakanlega sögu kynmóður sinnar; konunnar sem gaf hana forðum. Og utan múranna geisar styrjöld – rétt eins og innan þeirra.

Sindri Freysson ritar hér kröftuga sögu um innilokaðar konur, glæpi sem aldrei fyrnast og sakleysi sem glatast og verður aldrei endurheimt. Sindri fékk Bókmennataverðlaun Halldórs Laxness árið 1998 og síðasta skáldsaga hans, Flóttinn, hlaut einróma lof gagnrýnenda.

meira >

Hjá Veröld gefast nú ýmis tækifæri til að gleðjast. Svo skal dansa eftir Bjarna Harðarson rauk beint í annað sæti metsölulista Bókabúðar Máls og menningar á dögunum, Enginn ræður för eftir Runólf Ágústsson lék sama leik á handbókalista Eymundssonar í dag og Dóttir mæðra minna eftir Sindra Freysson fór einnig beint á metsölulista Eymundssonar. Menn hafa fagnað af minna tilefni og því drögum við út þrjá af póstlista Veraldar og hlýtur hver þeirra eina af þessum miklu metsölubókum.

Hinir heppnu eru með neðangreind netföng og geta vitjað vinningsins í höfuðstöðvum Veraldar á Bræðraborgarstíg 9:

Enginn ræður för - olafsson@ten.fr 

Dóttir mæðra minna - adda@simnet.is

Svo skal dansa - hannabj@visir.is

 

meira >

Á morgun, fimmtudaginn 29. október, kl. 16.30, fögnum við útgáfu bókarinnar Frá Evróvisjón til Evru eftir Eirík Bergmann í Eymundsson á Skólavörðustíg og eru allir velkomnir á meðan húsrúm leyfir.

 

Frá Evróvisjón til Evru hefur vakið mikla athygli síðan hún kom í verslanir. Pétur Gunnarsson gaf henni fjórar stjörnur í Fréttablaðinu og Bjarni Harðarson, einn rammasti andstæðingur aðildar Íslands að ESB, sagði að bókin væri "mikilvægt, áhugavert innlegg í umræðuna." Áður hefur komið fram að bæði Össur Skarphéðinsson utanríkisráðherra og Svanhildur Hólm Valsdóttir lögfræðingur hrósa bókinni á kápu, Össur segir að hún sé á "einsog leiftrandi spennusaga" og Svanhildur Hólm að þetta sé "aðgengilegt og yfirgripsmikið" yfirlit.

meira >