Í höfuðstöðvum Veraldar er fundað stíft þessa dagana enda stendur mikið til. Þrjár kiljur væntanlegar á markað. Fulltrúar Alþjóðagjaldeyrissjóðsins hafa enn ekki verið kallaðir til en hins vegar hefur útgáfustjóri Bjarts, Guðrún Vilmundardóttir, veitt útgáfustjóra Veraldar, Bjarna Þorsteinssyni, góð ráð en ennfremur hefur forstjóri auglýsingastofunnar Dynamo, Ólafur Unnar Kristjánsson, lagt gjörva hönd á plóg. Svo skemmtilega vildi til að Guðrún og Ólafur Unnar mættu í stíl á fyrsta fundinn og smellti hirðljósmyndari Veraldar, Sigfús Már Pétursson, mynd af þeim af því tilefni.

 

Kiljurnar sem um ræðir eru Auðnin eftir Yrsu Sigurðardóttur, Magnea eftir Sigmund Erni Rúnarsson og Áfrýjunin eftir John Grisham.

meira >

Danskur bókmenntaheimur nötrar eftir atburði dagsins. Ástæðan er einföld: nýtt forlag hefur sprottið fram, reynsluboltar læsa saman klónum og hyggja á mikla landvinninga. Bjartur & Veröld tengist þessum hræringum með óbeinum hætti. Helsti bakhjarl nýja forlagsins, sem nefnist C & K Forlag, er enginn annar en Hr. Ferdinand en annar eigenda þeirrar merku útgáfu er Snæbjörn Arngrímsson. Hr. Ferdinand var útrásararmur Bjarts en skilið var á milli íslenska og erlenda hlutans fyrir nokkru og hefur Snæbjörn sagt skilið við Bjart á Íslandi. Sjón, sem Bjartur gefur út, er ein helsta stjarna C & K Forlags. Þess má einnig geta að fulltrúi K-ins í nafninu, Karsten Nielsen, gaf út verk Yrsu Sigurðardóttur hjá Aschehoug í Danmörku áður en hann söðlaði um og ákvað að spreyta sig fyrir eigin reikning í bókaútgáfu. Hér má sjá ýtarlega umfjöllun um stofnun C & K í Politiken í dag.

 

Ekki náðist í Snæbjörn Arngrímsson við vinnslu fréttarinnar en hann var upptekinn á knattspyrnuæfingu og tók ekki símann. Ritstjórn Veraldarvefjarins sendir C & K - og ekki síður Hr. Ferdinand - árnaðaróskir í tilefni dagsins. Held og lykke! meira >

Veröld gefur út nú í vikunni þrjár metsölubækur í kilju: Auðnina eftir Yrsu Sigurðardóttur, Magneu eftir Sigmund Erni Rúnarsson og Áfrýjunina eftir John Grisham. Auðnin er "besta bók" Yrsu, að mati Páls Baldvins Baldvinssonar, og var hún ein mest selda bók nýliðins árs á Íslandi. Bók Sigmundar Ernis um Magneu Guðmundsdóttur, óþekkta alþýðukonu, var mest selda ævisaga síðustu jólavertíðar. Áfrýjunin eftir John Grisham fór beint í efsta sæti bandaríska metsölulistans þegar hún kom út þar í landi í janúar 2008 og aftur ári síðar þegar hún var gefin út í kilju. 

 

Metsölubækurnar þrjár eru allar prentaðar í Odda en þess má einnig geta að á föstudaginn var sendi stóri bróðir Veraldar, Bjartur, þangað fimm kiljur í prentun. Þannig fara átta kiljur í prentun í Odda í einu og er það stærsti prentsamningur um kiljur sem Bjartur & Veröld hefur gert. Auðnin, Magnea og Áfrýjunin koma í verslanir síðar í vikunni.

meira >

Bókaforlagið Bjartur-Veröld hefur skipt um nafn og heitir nú Bjartur & Veröld. Breytingin er gerð til að undirstrika að um sé að ræða tvö sjálfstæð bókaforlög, með mismunandi útgáfustefnu, sem þó starfi náið saman. Forlögin tvö eiga sér mislanga sögu. Fyrsta bókin sem kom út undir merkjum Bjarts leit dagsins ljós árið 1990 en Veröld hóf göngu sína árið 2005. Árið 2007 sameinuðust þessi ólíku forlög. Útgáfustjóri Bjarts er Guðrún Vilmundardóttir og útgáfustjóri Veraldar er Bjarni Þorsteinsson. Útgefandi Bjarts & Veraldar er Pétur Már Ólafsson.

 

meira >

Breska stórblaðið Guardian fjallar í dag um innrás nokkurra norrænna höfunda á breskan bókamarkað og er Yrsa Sigurðardóttir meðal þeirra sem getið er. Tilefni greinarinnar er það að annað bindi þríleiks Stieg Larssons, Stúlkan sem lék sér að eldinum, situr í efsta sæti metsölulista þar í landi og Kurt Wallander, lögregluforingi Henning Mankells, hefur nú holdgerst í bresku sjónvarpi í líki Kenneth Brannaghs.

 

Greinarhöfundur Guardian telur síðan upp norræna höfunda sem gert hafa strandhögg á Bretlandseyjum að undanförnu við mikinn fögnuð gagnrýnenda og lesenda en þeir eru, auk Larssons, Mankells og Yrsu, Jo Nesbø, Asa Larsson, Håkan Nesser, Karin Fossum - og Arnaldur okkar Indriðason. Þriðja táknið eftir Yrsu kom einmitt út í kilju í Bretlandi í upphafi mánaðarins og hafa bóksalar þar í landi teflt henni í fremstu röð. Sér grefur gröf er síðan væntanleg á markað í Bretlandi í apríl í innbundnu formi.

 

Stieg Larsson steig hins vegar sín fyrstu skref á Íslandi nú fyrir jólin með bókinni Karlar sem hata konur - en hún situr einmitt í efsta sæti metsölulista Eymundssonar þessa vikuna - rétt á undan Auðninni eftir Yrsu. Greinina í Guardian má lesa hér.

meira >

Ólafur Jóhann Sigurðsson er áberandi á metsölulista Eymundssonar sem birtist í dag. Ný útgáfa Páls sögu (Gangvirkið og Seiður og hélog) situr í fjórða sæti kiljulistans og þýðing hans á sígildu meistaraverki Johns Steinbeck, Mýs og menn, er í því tólfta. Þessi merki höfundar hefur því nýtt ár með látum en hann hefði orðið áttræður í september síðastliðnum.

 

Útgáfusamsteypan Bjartur og Veröld á hvorki meira né minna en sjö af fimmtán mest seldu kiljum vikunnar. Ekki spillir heldur gleðinni að Karlar sem hata konur eftir Stieg Larsson er söluhæsta skáldverkið og Silfurskeiðin söluhæsta handbókin. Þær raða sér í efstu sæti aðallistans og Auðnin eftir Yrsu Sigurðardóttur fylgir þar fast á eftir. Þá er gaman að segja frá því að Heitur snúður með glassúr eftir Gunnstein Ólafsson og Freydísi Kristjánsdóttur kemur sterkur inn í tíunda sæti barnabókalistans.

meira >

Fischer Verlag í Þýskalandi hefur nú tryggt sér útgáfuréttinn á Biobörnum eftir Yrsu Sigurðardóttur en það er fyrsta barnabókin eftir hana sem kemur út erlendis. Fischer gefur einnig út glæpasögur hennar ytra. Yrsa hlaut Íslensku barnabókaverðlaunin árið 2003 fyrir Biobörn en eftir þá bók sneri hún sér sem kunnugt er að ritun glæpasagna og hafa þær fært henni alþjóðlega viðurkenningu og vinsældir, auk þess sem hún er einn mest seldi skáldsagnahöfundur landsins. meira >

Aldrei áður hefur glæpasaga Yrsu Sigurðardóttur selst jafn vel og Auðnin nú fyrir jólin. Ævisaga Magneu Guðmundsdóttur, óþekktu alþýðukonunnar, eftir Sigmund Erni sló rækilega í gegn. Þór - í Heljargreipum eftir Friðrik Erlingsson er svo gott sem á þrotum hjá útgáfunni. John Grisham kom sterkur inn á íslenskan bókamarkað eftir áralanga fjarveru. Glæsileg bók um Ísland eins og það birtist utan úr geimnum leit dagsins ljós. Tónlistarfrömuðurinn Gunnsteinn Ólafsson spratt fram sem fullskapaður barnabókahöfundur. Þetta eru helstu tíðindi vertíðarinnar í Veröldinni.

 

Þegar litið er til ársins í heild vekur sérstaka gleði hvernig lesendur tóku fyrstu og einu ljóðabók Ólafs Ragnarssonar, Agnarsmá brot úr eilífð, en hann lést langt um aldur fram þann 27. mars síðastliðinn. Hann var annar stofnenda bókaforlagsins Veraldar. Þá sló kiljuútgáfa á Pálssögu Ólafs Jóhanns Sigurðssonar rækilega í gegn. Árið var þannig viðburðaríkt í Veraldarsögunni - en hér gildir eins og víðar: You ain't seen nothing yet!

 

Ritstjórn Veraldarvefjarins óskar landsmönnum gleðilegra jóla, árs og friðar.

meira >

Magnea eftir Sigmund Erni Rúnarsson er besta ævisagan í ár að mati starfsfólks bókaverslana. Þetta var tilkynnt sama dag og Morgunblaðið upplýsti að bókin væri mest selda ævisaga landsins. Það er því óhætt að segja að Magnea Guðmundsdóttir og Sigmundur Ernir Rúnarsson hafi haft ástæðu til að fagna í gær - enda ekki á hverjum degi sem maður á bæði mest seldu og bestu ævisögu landsins! Ritstjórn Veraldarvefjarins óskar þeim til hamingju með þessa verðskulduðu viðurkenningu - og frábæra bók. Þess má geta að þau árita bókina á laugardaginn í Hagkaupum í Kringlunni kl. 14 og í Smáralind kl. 15. Þau munu ekki árita víðar fyrir þessi jól. meira >

Allt bendir til þess að Auðnin eftir Yrsu Sigurðardóttur verði mest selda skáldsaga hennar frá upphafi. Aðeins Myrká eftir Arnald Indriðason hefur setið ofar á skáldasagnalistum jólabókatíðarinnar - en þar er, eins og Hallur Hallsson sagði forðum, ekki við mann að eiga. Auðnin var prentuð í 10.000 eintökum í upphafi og þótti djarft.

 

Þá er Magnea eftir Sigmund Erni Rúnarsson mest selda ævisaga jólabókatíðarinnar, skv. metsölulista Morgunblaðsins. Hún var prentuð í stærra upplagi en vani er með ævisögur, hvað þá þegar um óþekkta alþýðukonu er að ræða. Nú hafa forráðamenn Veraldar gripið til þess örþrifaráðs að ræsa út kvöld- og næturvaktir í Prentsmiðjunni Odda til að fá önnur upplög af Auðninni og Magneu í hús áður en stærsta söluhelgi ársins gengur í garð. Marteinn Jónasson, yfirsölustjóri Odda, og Björn Svanur Víðisson, aðalviðskiptastjóri sömu prentsmiðju, fullyrða að ekki muni skorta eintök af þessum miklum metsölubókum fyrir jólin. Og þegar þeir hafa talað - þá hafa þeir talað.

meira >