Í dag, 26. september, kemur út í kilju hjá Veröld Páls saga eftir Ólaf Jóhann Sigurðsson en hann fæddist á þessum degi fyrir níutíu árum. Hann lést árið 1988. Saga Ólafs Jóhanns af Páli Jónssyni blaðamanni kom út í þremur hlutum á árunum 1955-1983 og er hér að finna fyrstu tvo, Gangvirkið og Seið og hélog. Lokaþáttur bálksins, Drekar og smáfuglar, er væntanlegur á markað á nýju ári. Þríleikurinn hefur verið ófáanlegur um langt árabil. Ólafur Jóhann Sigurðsson er einn virtasti rithöfundur þjóðarinnar á 20. öld og hlaut hann bókmenntaverðlaun Norðurlandaráðs árið 1976, fyrstur Íslendinga. Páls saga er margrómað verk og á bókarkápu er vitnað í Vigdísi Finnbogadótur, fyrrverandi forseta Íslands, Arnald Indriðason rithöfund, og Véstein Ólason prófessor um verk Ólafs Jóhanns. Arnaldur segir að þríleikurinn sé „eitt af meistaraverkum 20. aldarinnar“  en Vigdís segir: „Þessi magnaða saga Ólafs Jóhanns um tíðarandann á miðri síðustu öld kemur hér til okkar upp á nýtt, - pælingar Páls blaðamanns í heimsmyndinni eins og hún var þá, - og það er eins og sú heimsmynd hafi lítið breyst. Þessi saga er líka um leit okkar að sjálfsmynd, sem alltaf er jafn aðkallandi, þó leiksvið heimsins í áranna rás færist eitthvað til.“ Þá skrifaði Vésteinn ritdóm í Tímarit Máls og menningar á sínum tíma um sagnabálkinn að hann væri „eitt af öndvegisverkum íslenskrar skáldsagnagerðar.“ Þóra Sigríður Ingólfsdóttir bókmenntafræðingur ritar formála að Páls sögu. Þá var fjallað ýtarlega um Ólaf Jóhann og Páls sögu í Kiljunni hjá Agli Helgasyni þar sem Halldór Guðmundsson fer á kostum. meira >

Aska Yrsu Sigurðardóttur er enn eina vikuna á metsölulista Eymundssonar en þar hefur hún setið frá því að hún kom út fyrir tæpu ári, fyrst í innbundnu formi en síðar í kilju. Það er því ekkert lát á vinsældum Yrsu á meðal íslenskra lesenda. Metsölubókin Síðasta uppgötvun Einsteins er sem fyrr í fyrsta sæti kiljulistans sem birtur var í dag og Piltur og stúlka eftir Jón Thoroddsen í öðru. Ljóðabók Ólafs Ragnarssonar, Agnarsmá brot úr eilífð, er enn á meðal mest seldu skáldverka í innbundnu formi en þar hefur hún setið frá fyrsta degi. meira >

Elva Ósk Ólafsdóttir leikkona. Rætt hefur verið um að hún leiki Þóru Guðmundsdóttur lögmann í Ösku.

Kvikmyndafélagið Pegasus hefur tryggt sér réttinn á Ösku eftir Yrsu Sigurðardóttur. Vonir standa til þess að tökur geti hafist á næsta ári en framleiðandi myndarinnar, Snorri Þórisson, tekur fram að málið sé á algjöru frumstigi. Aska kom út í innbundnu formi fyrir síðustu jól og varð meðal mest seldu bóka ársins. Hún var gefin út í kilju í mars síðastliðnum og hefur setið á metsölulistum síðan. Rætt hefur verið um að Elva Ósk Ólafsdóttir leikkona leiki Þóru Guðmundsdóttur lögmann, aðalpersónu Ösku. meira >

Áfrýjunin eftir John Grisham er nú á leið í prentsmiðju en Helgi Már Barðason þýðandi hefur rekið smiðshöggið á verk sitt. Grisham er einn vinsælasti spennusagnahöfundur allra tíma og hafa bækur hans selst í meira en 225 milljónum eintaka.
Fyrsta metsölubók hans var Fyrirtækið en meðal annarra þekktra sagna hans eru Pelíkanaskjalið, Dauðasök, Skjólstæðingurinn og Sækjandinn. Allar hafa þær komið út á íslensku og allar hafa þær verið kvikmyndaðar. Áfrýjunin hefur hlotið frábærar viðtökur víða um heim; bókin stökk beint í efsta sæti metsölulista vestan hafs og gagnrýnendur hafa ausið hana lofi, t.d. sagði gagnrýnandi New York Times að þetta væri besta bók Grishams um langt árabil. Áfrýjunin er væntanleg á markað í október hjá Veröld. meira >

Bókaútgáfan Veröld og íslenska kvikmyndafyrirtækið CAOZ hafa gengið frá samningi um útgáfu bókarinnar Þór í heljargreipum en CAOZ vinnur nú að alþjóðlegri tölvuteiknimynd um þrumuguðinn sem byggir á sömu sögu. Friðrik Erlingsson skrifar sögu Þórs en hann er einnig handritshöfundur kvikmyndarinnar. Friðrik er best þekktur fyrir margverðlaunaða skáldsögu sína, Benjamín dúfu. Gunnar Karlsson, annar leikstjóra kvikmyndarinnar og aðalhönnuður útlits og karaktera, teiknar myndir í bókina og gerir kápu. Kvikmyndin er væntanleg í bíó hérlendis um jólin 2010 og er áætlaður kostnaður á annan milljarð króna. Friðrik lýsir sögunni svo í Fréttablaðinu í dag að hún sé eins og "pönklag, hröð og mikið að gerast; hálfgert goðafræðipönk". Hér má sjá meira um myndina og kynningarstiklu.

Bókin Þór í heljargreipum er væntanleg á markað nú í október og er ætluð strákum og stelpum frá níu ára aldri.

meira >

Á næstunni kemur út hjá Veröld “Páls saga” Ólafs Jóhanns Sigurðssonar í tilefni þess að hann hefði orðið níræður þann 26. september næstkomandi. Þríleikur hans kom upphaflega út á árunum 1955-1983. Fyrstu tveimur hlutum hans, Gangvirkinu og Seiði og hélogum, er nú steypt saman í eitt bindi en lokahluti bálksins, Drekar og smáfuglar, er væntanlegur á markað á nýju ári. Verkið hefur verið ófáanlegt um langt árabil. Ólafur Jóhann Sigurðsson (1918-1988) er meðal virtustu rithöfunda þjóðarinnar á 20. öld. Hann hlaut bókmenntaverðlaun Norðurlandaráðs árið 1976, fyrstur Íslendinga. Á væntanlegri bókarkápu Páls sögu er vitnað í Vigdísi Finnbogadótur, fyrrverandi forseta Íslands, Arnald Indriðason rithöfund, og Véstein Ólason prófessor um verk Ólafs Jóhanns. Arnaldur segir að þríleikurinn sé “eitt af meistaraverkum 20. aldarinnar” en Vigdís segir:"Þessi magnaða  saga  Ólafs Jóhanns  um tíðarandann á miðri síðustu öld kemur hér til okkar upp á nýtt, - pælingar Páls blaðamanns í heimsmyndinni eins og hún var þá, - og það er eins og sú heimsmynd hafi lítið breyst. Þessi saga er líka  um leit okkar að sjálfsmynd, sem alltaf er  jafn aðkallandi, þó leiksvið heimsins í áranna rás færist eitthvað  til.“ Þá skrifaði Vésteinn ritdóm í Tímarit Máls og menningar á sínum tíma um sagnabálkinn að hann væri “eitt af öndvegisverkum íslenskrar skáldsagnagerðar.”
meira >

Spennutryllirinn Síðasta uppgötvun Einsteins situr í fyrsta sæti metsölulista Eymundssonar yfir kiljur sem birtur var í dag. Aska eftir Yrsu Sigurðardóttur þokast niður í sjötta sætið eftir að hafa trónað á toppnum í vikunni á undan. Bjartur Veröld á tvær aðrar bækur meðal tíu efstu í kiljum, Pilt og stúlku eftir Jón Thoroddsen og Svartfugl Gunnars Gunnarssonar. Strákurinn í röndóttu náttfötunum er svo í tólfta sæti og Út að stela hestum í því fimmtánda. Þá má geta þess að enn situr ljóðabók Ólafs Ragnarssonar meðal efstu skáldverka í innbundnu formi, er í öðru sæti eftir margra mánaða samfellda setu á listanum. meira >

Aska eftir Yrsu Sigurðardóttur trónir á toppi metsölulista Eymundssonar í flokki skáldverka í kilju. Aska kom út í vasabroti í mars síðastliðnum og hefur setið á metsölulistum allar götur síðan. Hún var gefin út í innbundnu formi fyrir síðustu jól og var þá meðal vinsælustu bóka. Yrsa á einnig tólftu mest seldu kilju vikunnar en það er Þriðja táknið sem hefur verið þaulsetið á metsölulistum undanfarin ár. Veröld gefur einnig út kiljuna sem er í sjöunda sæti en það er Strákurinn í röndóttu náttfötunum eftir John Boyne. Þá er gaman að geta þess að ljóðabók Ólafs Ragnarssonar, sem fengið hefur afbragðsdóma, situr enn meðal mest seldu skáldverka landsins í innbundnu formi.

meira >

"Ljúf bók og bjartsýn svo af ber, lýsir upp skammdegi ævikvöldsins," segir Sigurður Hróarsson, gagnrýnandi Fréttablaðsins um Agnarsmá brot úr eilífð eftir Ólaf Ragnarsson. Hann segir að bókin sjálf sé "afar vandaður og fallegur prentgripur, minnisvarði um virtan útgefanda, verklag til fyrirmyndar." Hann segir ennfremur að bókin sé kveðja höfundar til jarðlífsins en dauði ljóðanna sé söknuður en ekki endalok, sorgin sé þeirra sem eftir lifi. Ólafur Ragnarsson lést um það leyti sem bókin kom úr prentun fyrr á þessu ári. meira >

Í dag var opnuð á Facebook sérstakt svæði um Yrsu Sigurðardóttur. Þar er að finna margvíslegar upplýsingar  um Yrsu, ljósmyndir, erlendar og innlendar kápur og fleira. Fyrsti aðdáandinn til að skrá sig á síðuna var Danielle Emrich í New York og notaði hún tækifærið til að setja inn myndir frá heimsókn bandarískra blaðamanna til Íslands í tilefni af því að Þriðja táknið kom út vestra í fyrra vetur. Danielle segist ekki geta beðið eftir því að önnur bók Yrsu, Sér grefur gröf, komi út í Bandaríkjunum. Svæði Yrsu á Facebook er að finna hér. meira >