Meistaraverkið Mýs og menn eftir nóbelsskáldið John Steinbeck er nú loksins fáanlegt í kilju á íslensku í sígildri þýðingu Ólafs Jóhanns Sigurðssonar. Sögunni fylgir formáli eftir Einar Kárason.  Óhætt er að segja að þetta er ein frægasta skáldsaga 20. aldar og hefur hún fengið einróma lof um víða veröld.

Þessi magnaða saga segir frá farandverkamönnunum Georg og Lenna og draumi þeirra um að eignast jarðarskika með svolitlu húsi. Lenni er risastór og einfaldur rumur; Georg gætir Lenna eins og bróður síns og bjargar þeim iðulega úr vandræðum. Þeir ráða sig á stóran búgarð og draumurinn virðist loksins ætla að rætast en þá breytist allt.

 

Times Literary Supplement kallaði Mýs og menn "meistaraverk", gagnrýnandi Chicago Tribune lét svo um mælt að hér blandaðist saman "miskunnarleysi og viðkvæmni á sérkennilega hrífandi hátt,” í umsögn New York Times sagði að þetta væri "spennandi saga" sem þú legðir ekki frá þér fyrr en þú hefðir lokið henni. Breski rithöfundurinn Nick Hornby sagði einfaldlega að Mýs og menn væri "fullkomin skáldsaga".

meira >

Á bókmenntahátíðinni í Hay-on-Wye var Yrsa spurð að því hvort hún hræddi aldrei sjálfa sig með eigin skrifum í ljósi hinna myrku þátta í Þriðja tákninu. Þetta kemur fram á bloggi Rhian Davis á vef BBC en þar lýsir hún svari Yrsu svo: "Yrsa var fljót að svara sig, beinskeytt og með gamansemi sem einkenndi orð hennar í samtalinu, og sagði að Íslendingar væru vanir að "hræða börnin okkar" þannig að hún hræddist ekkert lengur.  meira >

Í 24 stundum í dag er vikið að þeim tíðindum að fimmtíu þúsundasti áskrifandinn að fréttabréfi Bjarts hafi fundist en síðan glatast aftur og gert nokkurt grín að vandræðagangi á ritstjórn Bjartsvefjarins. Forsagan er þessi: Tilkynnt var á umræddum vef að 50.000. áskrifandinn væri væntanlegur og síðan upplýst að það væri johann@jpv.is. Skömmu síðar kom í ljós að viðkomandi hefði skráð sig þrisvar sinnum áður og gæti því ekki talist fimmtíuþúsundasti áskrifandinn.

Ritstjórn Veraldarvefjarins tekur skýrt fram að enda þótt Bjartur sé systurforlag Veraldar þá eru ritstjórnir www.bjartur.is og www.verold.is algjörlega aðskildar. Ritstjórn www.verold.is ber því enga ábyrgð á vandræðaganginum á ritstjórn www.bjartur.is, þótt hún hafi fulla samúð með kollegum sínum.

meira >

Bókaforlagið Veröld hefur gefið út The Golden Circle and Blue Lagoon eftir Gunnstein Ólafsson og er hún í ritröðinni Iceland – Cool and Crisp. Bókina prýða myndir eftir marga af fremstu ljósmyndurum þjóðarinnar.

 

Bókin kemur einnig út á þýsku undir titlinum Der Goldene Ring und die Blaue Lagune í ritröðinni Island – Kurz und gut.

 

Báðar útgáfurnar eru í innbundnu formi og er hvor um sig 94 blaðsíður að lengd. Bókarkápur og innsíður hannaði Bergdís Sigurðardóttir en bækurnar eru prentaðar í Danmörku.

meira >

Bókaforlagið Veröld hefur gefið út bókina Reykjavík eftir ljósmyndarann Mariu Alva Roff og er hún í ritröðinni Iceland – Cool and Crisp.

 

Reykjavík er óvenjuleg höfuðborg: ung, kraftmikil og full af hugmyndum og leyndum þrám. En það er alltaf stutt í kyrrð og einfaldleika; gamalt bárujarnshús og forvitinn kött. Í bókinni Reykjavík er brugðið upp grípandi myndum þar sem borgin við Sundin er séð með auga gests sem tengst hefur henni sterkum böndum. Í stuttum textum er svo fjallað um það sem fyrir augu ber og ýmsa þætti borgarlífsins. Reykjavík er einnig fáanleg í þýskri útgáfu í bókaflokknum Island – Kurz und gut.

meira >

Yrsa Sigurðardóttir er nýkomin frá 80.000 manna bókmenntahátíð í velska smábænum Hay-on-Wye en meðal gesta í ár voru, auk hennar, Jimmy Carter, fyrrverandi forseti Bandaríkjanna, Garry Kasparov, fyrrverandi heimsmeistari í skák, rithöfundarnir Salman Rushdie, Ian McEwan, John Irving og Martin Amis, matgæðingurinn Jamie Oliver, ökuþórinn Jeremy Clarkson og Cheerie Booth, eiginkona Tony Blair. Á hátíðinni, sem Bill Clinton kallaði „Woodstock hugans“eftir að hann var gestur þar árið 2001, lét Kasparov gamminn geisa um Pútín, Jimmy Carter sagði aðspurður að George W. Bush yrði óhætt innan Bandaríkjanna eftir að hann léti af embætti – og mátti skilja að utan heimalandsins yrði hann ákærður fyrir stríðsglæpi – og Yrsa Sigurðardóttir ræddi í samtali á sviði um það hvernig er að glíma við glæpi.

 

Síðar í vikunni heldur Yrsa aftur til Bretlandseyja, að þessu sinni verður hún á glæpasagnahátíð í Bristol en á meðal annarra þátttakenda verða krimmahöfundarnir vinsælu Ian Rankin og Karin Fossum.

meira >

Guðmundur Andri Thorsson ritaði gein í Fréttablaðið 23. júní og fullyrti að Simone de Beauvoir væri alveg róleg í gröfinni - hún hefði ekki snúið sér þar við.

Tilefni skrifa hans var ádeila Björgu Hjartardóttur kynjafræðings í Lesbók Morgunblaðsins laugardaginn 21. júní á Ayaan Hirsi Ali en þar hélt hún því fram að Simone de Beauvoir hefði snúið sér við í gröfinni af því að sómalska baráttukonan hefði fengið verðlaun sem kennd eru við hana. 

Andri segir að þarna sé "nokkuð fast að orði kveðið um konu sem hætt hefur lífi sínu til að berjast gegn nauðungarhjónaböndum barnungra stúlkna, umskurði stúlkubarna og öðrum ósiðum sem fylgja trúræði og feðraveldi." Grein Andra má lesa í heild sinni hér.

Er óhætt að segja að miklar vonir séu bundnar við þessa ritdeilu! En meðan beðið er eftir útspili Bjargar er lesendum bent á að kynna sér líf og skoðanir Ayaan Hirsi Ali í sjálfsævisögu hennar, Frjáls, sem nú er fáanleg í kilju.

meira >

Simone de Beauvoir hefur snúið sér við í gröfinni, ef marka má Lesbók Morgunblaðsins, af því að sómalska flóttakonan Ayaan Hirsi Ali hlaut nýlega verðlaun í nafni hennar fyrir kvenfrelsisbaráttu. Ali vakti mikla á Íslandi á liðnu hausti þegar hún var gestur Bókmenntahátíðar í Reykjavík en sjálfsævisaga hennar, Frjáls, kom út um sama leyti. Hún er nú einnig fáanleg í kilju. Ali flúði kúgun og harðræði í Sómalíu og víðar en tókst að breyta veröldinni með hugrekki sínu. Hún varð þingmaður í Hollandi en leitaði skjóls í Bandaríkjunum undan ofsóknum múslima og er hennar gætt þar allan sólarhringinn. Í bókinni Frjáls segir Ali frá lífi sínu sem er ævintýri líkast.

Björg Hjartardóttir kynjafræðingur segir í grein í Lesbókinni þann 21. júní að að það sé deginum ljósara að það geti reynst erfitt fyrir femínista að horfast í augu við þá staðreynd að konu sem er boðberi jafn mótsagnakenndra viðhorfa til múslimskra kvenna sé hampað sem baráttukonu fyrir frelsi kvenna víða um heim. Hún lýkur grein sinni með þessum orðum: "Það kæmi mér alla vega ekki á óvart ef Simone de Beauvoir hefði nú þegar snúið sér við í gröfinni."

Ali flúði kúgun og harðræði í Sómalíu og víðar en tókst að breyta veröldinni með hugrekki sínu. Hún varð þingmaður í Hollandi en leitaði skjóls í Bandaríkjunum undan ofsóknum múslima og er hennar gætt þar allan sólarhringinn. Í bókinni Frjáls segir Ali frá lífi sínu sem er ævintýri líkast.

Frjáls hefur hlotið mikið lof austan hafs og vestan. Jón Kaldal, ritstjóri Fréttablaðsins, ritaði um Ali á liðnu hausti: "Ayaan Hirsi Ali er ein merkasta hetja okkar tíma. ... Lífshlaup hennar er dramatísk hetjusaga." Egill Helgason tók í sama streng í þætti sínum Kiljunni og sagði að Ali væri "einn hugaðasti einstaklingur samtíðarinnar og hugsanlega einn sá áhrifamesti."

meira >

Strákurinn í röndóttu náttfötunum eftir John Boyne fær þrjár og hálfa stjörnu hjá gagnrýnanda DV, Kristjáni Hrafni Guðmundssyni. Hann segir að Boyne sé svo sannarlega höfundur sem vert sé að gefa gaum því miðað við Strákinn í röndóttu náttfötunum kunni hann þá list vel að segja sögu. Á dögunum sagði Katrín Jakobsdóttir í Mannamáli Sigmundar Ernis á Stöð 2 að þetta væri bók sem léti engan ósnortinn. Það er því óhætt að mæla með Stráknum í röndóttu náttfötunum fyrir hvítasunnuhelgina. Hér má sjá dóminn úr DV og hér getur að líta samtal Katrínar og Sigmundar Ernis.

Þá minnum við líka á þrjár aðrar frábærar bækur sem slegið hafa í gegn: Aska Yrsu Sigurðardóttur er fimm stjörnu glæpasaga að mati Fréttablaðsins; Frjáls er sjáflsævisaga Ayaan Hirsi Ali sem er að sögn Egils Helgasonar einn hugaðasti einstaklingur samtíðarinnar og hugsanlega einn sá áhrifamesti; metsöluljóðabókin Agnarsmá brot úr eilífð eftir Ólaf Ragnarsson er gimsteinn, eins og Skúli Jón Sigurðsson, fyrrverandi forstöðumaður Rannsóknarnefndar flugslysa ritaði í umsögn sinni um bókina til forlagsins á dögunum.

Þrjár frábærar bækur fyrir hvítasunnuna!

meira >

Meistaraverkið Mýs og menn eftir John Steinbeck stökk óvænt í þriðja sæti metsölulista sjálfstæðra bókabúða í Bretlandi á dögunum, næst á eftir Þúsund björtum sólum eftir Khaled Hosseini og Engleby eftir Sebastian Faulks. Þetta er skemmtileg tilviljun því að skáldsaga Steinbecks á nú loksins möguleika á því að komast á metsölulista á Íslandi því að hún verður í fyrsta sinn gefin út í kilju á næstu vikum hjá Veröld í sígildri þýðingu Ólafs Jóhanns Sigurðssonar. Einar Kárason fylgir bókinni úr hlaði með inngangi.

Mýs og menn er ein frægasta skáldsaga 20. aldar og hefur hlotið einróma lof um víða veröld. Þessi magnaða saga segir frá farandverkamönnunum Georg og Lenna og draumi þeirra um að eignast jarðarskika með svolitlu húsi. Lenni er risastór og einfaldur rumur, Georg gætir Lenna eins og bróður síns og bjargar þeim iðulega úr vandræðum. Þeir ráða sig á stóran búgarð og draumurinn virðist ætla að rætast en þá breytist allt.

Sagan hefur margsinnis verið sett á svið og kvikmynduð. Hún kemur út hjá Veröld nú í júní, eins og fyrr segir.

meira >