Í dag kemur formlega út hjá Veröld ljóðabókin Agnarsmá brot úr eilífð eftir Ólaf Ragnarsson fyrrum bókaútgefanda og fréttamann. Ljóðin orti Ólafur síðustu tvö ár ævi sinnar eftir að hann greindist með MND-sjúkdóminn, hreyfitaugahrörnun, og missti málið af völdum hans. Þótt hann væri nánast alveg orðinn lamaður frá tungurótum og niður í tær er ljóst af ljóðunum að baráttuviljinn var óbilandi, hugurinn frjáls og flögraði víða.

 

Á kápu bókarinnar er vitnað til umsagnar Matthíasar Johannessen um ljóð Ólafs en þar segir: „Ólafur hefur ljóðskáldstaugar, er persónulegur og hlýr og er næmur fyrir landi og umhverfi. En mesta athygli vekur þrekmikið æðruleysi og afstaða hans til lífs og dauða.“

 

Ólafur Ragnarsson lést þann 27. mars síðastliðinn en bókin kom úr prentverkinu nokkrum dögum áður.

 

Agnarsmá brot úr eilífð fór strax á útgáfudegi í annað sæti metsölulista Eymundssonar yfir innbundin skáldverk.

meira >

Strákurinn í röndóttu náttfötunum eftir John Boyne er "bók sem lætur engan ósnortinn," að mati Katrínar Jakobsdóttur gagnrýnanda. Þetta kom fram í þættinum Mannamáli í umsjá Sigmundar Ernis á Stöð 2 á dögunum. Það leynir sér ekki í samtali þeirra að þau féllu bæði fyrir þessari einstöku bók, t.d. segir Sigmundur Ernir á einum stað: "Ég tek eftir að þú ert nokkuð heilluð af þessari bók." Og ekki vildi Katrín sverja fyrir það.

Umfjöllunina má sjá í heild sinni hér. Það má segja að Katrín og Sigmundur Ernir séu svipaðrar skoðunar og gagnrýnandi Irish Times sem sagði í umsögn sinni um Strákinn í röndóttu náttfötunum: "Ég sat eftir með tárin í augunum."

meira >

Ljóðabók Ólafs Ragnarssonar, Agnarsmá brot úr eilífð, er mest selda innbundna skáldverkið í Eymundsson um þessar mundir. Það staðfestir metsölulisti dagsins. Fast á hæla honum á listanum koma gamlir kunningjar hans, höfundar sem Ólafur gaf út á löngum ferli: Þórarinn Eldjárn er í öðru sæti, Steinn Steinarr í því þriðja og Halldór Laxness í því sjöunda og níunda.

Agnarsmá brot úr eilífð hefur að geyma ljóð sem Ólafur orti tvö síðustu ár ævi sinnar en hann lést eftir harða glímu við MND-sjúkdóminn þann 27. mars síðastliðinn.

meira >

Síminn á skrifstofum Veraldar hefur ekki stoppað að undanförnu vegna kápumyndarinnar á bókinni Strákurinn í röndóttu náttfötunum. Menn spyrja einum rómi: Hvað merkir þríhyrningurinn á náttfötunum? Hér er því til að svara að myndin er fengin frá safninu í Auschwitz í Póllandi og sýnir fanga í útrýmingarbúðunum. Nasistar skráðu fanga með númerum og þríhyrningi eða Davíðsstjörnu og fór það eftir því hvaða flokki fanga viðkomandi tilheyrði og ástæðu þess að hann hafði verið sendur til Auschwitz.

Sagan Strákurinn í röndóttu náttfötunum hefur verið hlaðin lofi um víða veröld og nægir þar að nefna að Guardian sagði að þetta væri “undraverð skáldsaga”, USA Today að hún væri “kraftmikil og hrífandi” og gagnrýnandi Irish Independent komst svo að orði: “Þessi bók er svo einföld, svo áreynslulaus að hún nálgast fullkomnun. Ég sat eftir með tárin í augunum.”

meira >

Bókaforlagið Veröld hefur gengið frá samningum um útgáfu á Ösku eftir Yrsu Sigurðardóttur í Noregi og Danmörku. Þar með er ljóst að þessi glæpasaga Yrsu kemur út á að minnsta kosti sjö erlendum tungumálum en áður hefur verið samið um útgáfu á þýsku, pólsku, grísku, sænsku og um allan hinn spænskumælandi heim. Þá standa yfir samningaviðræður við forlög víða um lönd.

 

Aska er þriðja glæpasaga Yrsu Sigurðadóttur. Hún var ein mest selda bók síðustu jólavertíðar og hlaut góða dóma, meðal annars fimm stjörnur í Fréttablaðinu. Frumraun hennar á þessu sviði, Þriðja táknið, kom út árið 2005 og er engin íslensk skáldsaga eftir núlifandi höfund væntanleg á fleiri tungumálum en þau eru nú orðin meiri en þrjátíu talsins. Sér grefur gröf kemur um þessar mundir út víða um heim en útgáfurétturinn á henni hefur verið seldur á fjórtán tungumálum. Þetta var jafnframt fyrsta bók Yrsu til að komast inn á erlenda metsölulista en það gerðist bæði í Þýskalandi og Austurríki.

meira >

Ólafur Ragnarsson, sem borinn er til grafar í dag, er einhver hugdetturíkasti maður sem ég hef kynnst. Hugmyndirnar kviknuðu ein af annarri hjá honum, hann hafði ánægju af því að ræða þær við samstarfsmenn, hreif alla með sér – og var um leið hrifnæmur sjálfur; eitt leiddi af öðru, stuttur fundur að morgni um stöðu bókaklúbbs hjá Vöku-Helgafelli áður en menn héldu til verka varð að maraþonsetu þar sem hugmyndir að nýjum bókum, ritröðum eða öðru fæddust hver af annarri. Undir kvöld var þessum “stutta” fundi slitið. Tilefni hans var kannski löngu gleymt en í staðinn höfðu menn ef til vill dottið niður á óvænta leið til að vekja athygli á verkum Halldórs Laxness erlendis, lagt drög að kynningarefni, hringt nokkur símtöl og sett allt í gang.

 

Ég kynntist Ólafi Ragnarssyni haustið 1991 þegar ég réð mig í sex vikna verkefni hjá Vöku-Helgafelli. Þetta varð upphafið að ógleymanlegum kynnum og vináttu sem er mér ákaflega dýrmæt og aldrei bar skugga á.

meira >

Bókaforlagið Veröld hefur gengið frá samningi um útgáfu á næstu glæpasögu Yrsu Sigurðardóttur hjá Fischer Verlag í Þýskalandi – áður en hún hefur skilað inn handriti að sögunni. Glæpasagan, sem enn hefur ekki hlotið nafn, kemur út á Íslandi í haust. Þetta sýnir sterka stöðu Yrsu á þýskum bókamarkaði en Þriðja táknið og Sér grefur gröf hafa selst í á annað hundrað þúsund eintökum þar í landi og sú síðarnefnda rataði meira að segja inn á kiljulistann þar í lok nýliðins árs. Þriðja glæpasaga Yrsu, Aska, kemur út í haust í Þýskalandi en verk hennar eru væntanleg á yfir þrjátíu tungumálum um allan heim.

 

Yrsa hefur verið dugleg að fylgja eftir bókum sínum í Þýskalandi og er einmitt um þessar á upplestrarferð þar um slóðir.

meira >

Föstudaginn 4. apríl verða skrifstofur Veraldar og Bjarts lokaðar frá kl. 10-14 vegna jarðarfarar Ólafs Ragnarssonar bókaútgefanda en hún fer fram frá Dómkirkjunni í Reykjavík. Ólafur var annar stofnenda Veraldar árið 2005 en varð að draga sig út úr fyrirtækinu í ársbyrjun 2006 vegna heilsubrests. Í fyrra kom út hjá Veröld bók hans Til fundar við skáldið Halldór Laxness og á næstunni verður gefin út ljóðabók hans Agnarsmá brot úr eilífð.

Ólafur Ragnarsson hóf bókaútgáfu árið 1981 er hann stofnaði Vöku ásamt Elínu Bergs, eiginkonu sinni. Fjórum árum síðar keypti Vaka hið gamalgróna forlag Helgafell. Ólafur varð innan fárra ára einn umsvifamesti útgefandi landsins. Vaka-Helgafell sameinaðist Máli og menningu undir merkjum Eddu - miðlunar og útgáfu árið 2000 og tveimur árum síðar sagði Ólafur skilið við félagið. Hann stofnaði síðan Veröld með Pétri Má Ólafssyni árið 2005.

meira >

Ljóðabók Ólafs Ragnarssonar, Agnarsmá brot úr eilífð, er enn í fyrsta sæti á metsölulista Eymundssonar yfir innbundin skáldverk. Það er ljóst að þrekmikið æðruleysi Ólafs hefur heillað lesendur um land allt. Útgáfunni barst t.d. nýlega óvænt umsögn Skúla Jóns Sigurðarsonar, fyrrverandi forstöðumanns Rannsóknarnefndar flugslysa. Hann sagði: "Bókin hans Ólafs er gimsteinn og perlurnar í henni snerta viðkvæma strengi í brjósti hvers manns." Þá bloggaði Hulda Sigurdís Þráinsdóttir um bókina á dögunum og ritaði: "Þessi bók er hrein snilld. Fyrir utan að vera virkilega falleg og smekklega unnin eru ljóðin ótrúlega falleg. Þau eru svo full af tilfinningu og þroska. Mæli sérstaklega með ljóðinu Hugarhiminn. Þetta er bók sem enginn alvöru ljóðaunnandi má láta framhjá sér fara." meira >

Veröld hefur gefið út í kilju írsku skáldsöguna Strákurinn í röndóttu náttfötunum eftir John Boyne í þýðingu Áslaugar Agnarsdóttur og er þetta frumútgáfa á íslensku. Bruno, sem er níu ára þýskur drengur í síðari heimsstyrjöld, veit ekkert um helförina eða grimmdarverk landa sinna erlendis. Dag einn flytur fjölskyldan úr notalegu húsi þeirra í Berlín og upp í sveit þar sem hann hefur engan til að leika við.

 

Þar kynnist hann Shmuel; strák sem lifir undarlegu lífi handan girðingar og klæðist þar að auki röndóttum náttfötum – eins og allir aðrir hinum megin gaddavírsins. En vinátta Brunos og Shmuels á eftir að draga dilk á eftir sér og hafa ófyrirsjáanlegar afleiðingar.

 

Bókin hefur verið hlaðin lofi um víða veröld og nægir þar að nefna að Guardian sagði að þetta væri “undraverð skáldsaga”, USA Today að hún væri “kraftmikil og hrífandi” og gagnrýnandi Irish Independent komst svo að orði: “Þessi bók er svo einföld, svo áreynslulaus að hún nálgast fullkomnun. Ég sat eftir með tárin í augunum.”

 

Hollywoodmynd á leiðinni
Framleiðendur Harry Potter myndanna, kvikmyndafyrirtækið Heyday, hefur nú lokið framleiðslu á kvikmynd byggðri á bókinni og verður hún frumsýnd innan skamms.

meira >