Í viku bókarinnar, sem nú stendur yfir, geta Íslendingar loksins prentað peninga. Á heimasíðu Félags íslenskra bókaútgefenda býðst þér að prenta út 1.000 króna ávísun sem þú getur leyst út í næstu bókabúð. Eina skilyrðið er að þú kaupir bækur útgefnar á Ísland fyrir að minnsta kosti 3.000 krónur. Þú leggur fram 2.000 krónur - og færð 1.000 krónur að gjöf! Við hvetjum alla til að bregða undir sig betri fætinum og skella sér í næstu bókabúð. Þar er meðal annars að finna frábærar kiljur á borð við Ösku eftir Yrsu Sigurðardóttur, Strákinn í röndóttu náttfötunum eftir John Boyne, Frjáls eftir Ayaan Hirsi Ali, auk metsöluljóðabókar Ólafs Ragnarssonar, Agnarsmá brot úr eilífð. Ávísunina má, eins og fyrr segir, prenta út hér.

Gleðilega bókaviku!

meira >

Síðdegisútvarp Rásar 2 fjallaði stuttlega um ljóðabók Ólafs Ragnarssonar, Agnarsmá brot úr eilífð, í gær þegar hún kom út og var niðurstaðan skýr: "Síðdegisútvarpið mælir með þessari fallegu ljóðabók." Hér má heyra umfjöllunina en hana er að finna í lok upptökunnar. Þess má geta að bókin stökk beint í annað sæti metsölulista Eymundssonar, sem birtur var í gær, í flokki innbundinna skáldverka. meira >

Aska eftir Yrsu Sigurðardóttur er enn í öðru sæti á nýjum metsölulista Eymundssonar yfir allar bækur - aðra vikuna í röð. Það er því óhætt að segja að þessi fimm stjörnu glæpasaga Yrsu njóti mikilla vinsælda meðal þjóðarinnar en Aska var meðal mest seldu bóka síðasta árs í innbundnu formi. Nú þegar hefur verið samið um útgáfu á Ösku víða um lönd en bækur Yrsu eru væntanlegar á meira en þrjátíu tungumálum í öllum byggðum heimsálfum jarðar. Engin bókaútgáfa á fleiri bækur á aðallista Eymundssonar en samsteypan Bjartur Veröld og hafa menn fagnað af minna tilefni!

meira >

Ólafur Ragnarsson lést í gær 63 ára að aldri. Hann stofnaði bókaforlagið Veröld ásamt Pétri Má Ólafssyni árið 2005 en varð að draga sig út úr félaginu í ársbyrjun 2006 vegna heilsubrests. Veröld gaf út eftir hann bókina Til fundar við skáldið Halldór Laxness fyrir jól í fyrra en þar er að finna ómetanleg samtöl hans við Nóbelsskáldið. Þá féll hann frá fullbúinni ljóðabók sem væntanleg er á markað á næstu dögum hjá Veröld.

Ólafur Ragnarsson átti að baki merkan feril sem útgefandi, fyrst hjá Vöku, síðar Vöku-Helgafelli og Eddu - útgáfu og miðlun og loks Veröld. Þá liggja eftir hann ýmis ritverk og ber þar hæst þrjár bækur um Halldór Laxness.

Starfsmenn Bjarts Veraldar senda eftirlifandi eiginkonu Ólafs, Elínu Bergs, sonum þeirra, Ragnari Helga og Kjartani Erni, og fjölskyldu þeirra allri innilegar samúðarkveðjur.

meira >

Bækur Ólafs Ragnarssonar um Halldór Laxness, Líf í skáldskap (2002) og Til fundar við skáldið Halldór Laxness (2007) eru "einstakur vitnisburður um samband skálds og útgefanda," segir Jakob F. Ásgeirsson í nýjasta tölublaði Þjóðmála. Hann segir að bækurnar geymi mikinn fróðleik og hafi á sér viðfeldinn blæ. Umfram allt takist Ólafi að sýna skáldið eins og það sá sjálft sig og ævi sína á efri árum. Þá ritar Jakob að bækur Ólafs um Halldór Laxness séu "einstaklega vel úr garði gerðar, hannaðar af smekkvísi og glæsilega myndskreyttar." Umsögn Jakobs F. Ásgeirssonar má lesa í heild sinni hér. meira >

Sasa Stanisic fékk á dögunum virt bókmenntaverðlaun, sem kennd eru við Adelbert von Chamisso, fyrir bók sína Hermaður gerir við grammófón en hún kom út hjá Veröld fyrir síðustu jól. Verðlaunin, sem nema 15.000 evrum, eru veitt höfundi sem skrifar á þýsku enda þótt hún sé ekki móðurmál hans. Stanisic er að mati dómnefndar framúrskarandi hæfileikaríkur og bók hans allt í senn fyndin og sorgleg, létt og erfið, ljóðræn og áköf.

Hermaður gerir við grammófón er frumraun Stanisic á skáldsagnasviðinu. Hann var gestur Bókmenntahátíðar í Reykjavík á liðnu hausti og hlaut afar lofsamlega dóma í íslenskum fjölmiðlum fyrir sögu sína.

meira >

Lesbók Morgunblaðsins birti á dögunum ljóðið Vetur ásamt fallegri myndskreytingu. Höfundur var sagður Ólafur Ragnarsson og að hann fengist við ritstörf. Fjölmargir hafa velt því fyrir sér hvort þetta sé sami Ólafur Ragnarsson og var um árabil umsvifamikill útgefandi og höfundur ýmissa rita almenns efnis, m.a. tveggja stórra bóka um Halldór Laxness.

Það skal upplýst hér að þetta er einn og sami maðurinn - og það sem meira er: Fyrsta ljóðabók Ólafs, Agnarsmá brot úr eilífð, er væntanleg hjá Veröld innan skamms. Yrkisefni Ólafs eru margbreytileg og persónuleg og snerta lesandann. Á kápu er vitnað í Matthías Johannessen skáld sem segir um ljóð Ólafs: "Ólafur hefur ljóðskáldstaugar, er persónulegur og hlýr og er næmur fyrir landi og umhverfi. En mesta athygli vekur þrekmikið æðruleysi og afstaða hans til lífs og dauða."

Agnarsmá brot úr eilífð kemur út innan fárra vikna en þangað til geta lesendur yljað sér við lestur Vetrar með því að smella hér.

meira >

Aska eftir Yrsu Sigurðardóttur stökk beint í annað sæti metsölulista Eymundssonar yfir allar bækkur sem gefinn var út í dag. Aðeins Þúsund bjartar sólir eftir Khaled Hosseini er ofar. Aska kom sem kunnugt er út fyrir síðustu jól í innbundnu formi og hlaut frábærar viðtökur, fékk m.a. fimm stjörnur í Fréttablaðinu. Þá hefur verið samið um útgáfu á Ösku víða um lönd.

Fyrri glæpasögur Yrsu, Þriðja táknið og Sér grefur gröf, eru enn sem fyrr á lista yfir mest seldu kiljur landsins - nú í 14. og 15. sæti.

meira >

Metsölubókin Frjáls eftir Ayaan Hirsi Ali er komin út í kilju. Ali var einn umtalaðasti gestur Bókmenntahátíðarinnar í Reykjavík á liðnu hausti. Þangað kom hún í tilefni af útgáfu ævisögu sinnar í innbundnu formi hjá Veröld. Ali flúði kúgun og harðræði í Sómalíu og víðar en tókst að breyta veröldinni með hugrekki sínu. Hún varð þingmaður í Hollandi en leitaði skjóls í Bandaríkjunum undan ofsóknum múslima og er hennar gætt þar allan sólarhringinn. Í bókinni Frjáls segir Ali frá lífi sínu sem er ævintýri líkast.

Frjáls hefur hlotið mikið lof austan hafs og vestan. Jón Kaldal, ritstjóri Fréttablaðsins, ritaði um Ali á liðnu hausti: "Ayaan Hirsi Ali er ein merkasta hetja okkar tíma. ... Lífshlaup hennar er dramatísk hetjusaga." Egill Helgason tók í sama streng í þætti sínum Kiljunni og sagði að Ali væri "einn hugaðasti einstaklingur samtíðarinnar og hugsanlega einn sá áhrifamesti."

Gagnrýnandi The New York Times sagði í umsögn sinni um bókina: "Fagurlega skrifaðar minningar sem bera vott um ótrúlegan kjark." Og ekki var síðri dómurinn í The Wall Street Journal þar sem sagði að Frjáls væri "heillandi sjálfsævisaga." Í umsögn Sunday Times kom fram að þetta væri "stórkostleg bók" og að Frjáls sýndi "að kjörkuð kona getur breytt sögunni - ekki bara eigin örlögum." Vikuritið Time útnefndi Ayaan Hirsi Ali fyrir skemmstu einn af 100 áhrifamestu einstaklingum samtímans.

meira >

Sunday Express gefur Þriðja tákninu eftir Yrsu Sigurðardóttur fjórar stjörnur af fimm mögulegum og segir gagnrýnandi blaðsins að þetta sé mjög góð spennusaga. Hann talar um innrás Íslendinga í tískuverslanir og fjármálastarfsemi í Bretlandi og nú síðast bætist við fyrsta flokks spennusögur.

 

Að undanförnu hefur Þriðja táknið verið hlaðið lofi í breskum fjölmiðlum. Gagnrýnandi The Times ritaði að breskir lesendur yrðu nú að gefa tveimur góðum íslenskum glæpasagnahöfundum gaum, Arnaldi Indriðasyni og Yrsu Sigurðardóttur, Daily Telegraph sagði að Þriðja táknið væri létt og leikandi, bókin fékk fimm stækkunargler af fimm mögulegum í vefmiðlinum Crime Squad gaf bókinni og fjórar stjörnur af fimm í tímaritinu SHE. Sunday Telgraph sagði að bókin væri „fullkomin frumraun“, gagnrýnandi Guardian skrifaði að bókin væri „fyndin og áhugaverð“ og að mati tímaritsins Woman and Home er Þriðja táknið „æsispennandi frumraun.“

meira >