Þau tíðindi urðu í dag að Guðni Ágústsson lagði sjálfan Harry Potter á metsölulista Eymundssonar - með hjálp ævisöguhöfundar síns, Sigmundar Ernis, og Yrsa Sigurðardóttir stökk beint í 39. sæti þýska kiljulistans sem birtur verður mánudaginn 10. desember með glæpasögu sína Sér grefur gröf. Þá nartar hún enn í hælana á Arnaldi Indriðasyni á metsölulistum hérlendis með nýjustu bók sinni, Ösku. Þá er bók Ólafs Ragnarssonar, Til fundar við skáldið Halldór Laxness, komin á fljúgandi siglingu - enda mál manna að hér sé líklega komin skemmtilegasta Laxnessbókin.

Menn hafa fagnað af minna tilefni og því hefur verið ákveðið að draga út flugmiða fyrir tvo til Barcelona í boði Heimsferða í Veröldinni okkar og sá  heppni fær einnig bækurnar þrjár, Guðni - Af lífi og sál, Ösku og Til fundar við skáldið Halldór Laxness. Netfangið sem dregið var út er: einsi@emax.is.

meira >

"Aska er hörkuvel fléttuð glæpasaga," segir Áki G. Karlsson á www.kistan.is. Þar með er fyrsti dómurinn um þriðju glæpasögu Yrsu Sigurðardóttur fallinn og ekki hægt að kvarta yfir honum - þvert á móti. Áki heldur síðan áfram: "Það sem ber verkið uppi er vel riðinn söguþráður, úthugsuð flétta sem heldur lesandanum við efnið með því að gefa hæfilega mikið af upplýsingum og skilja eftir nógu marga lausa enda þegar glittir í lausn gátunnar til að teyma mann áfram alveg þar til hinn óvænti endahnútur er festur." Hann lýkur umsögn sinni með þessum orðum: "Aska er spennandi frá upphafi til enda, hreinræktuð glæpasaga þar sem fléttan sjálf er í fyrirrúmi og glæsilega tekst til að teyma lesandann frá einum kafla til þess næsta án þess að gefa nokkurn tíma slaka."

Aska eftir Yrsu Sigurðardóttur er væntanleg á markað í á þriðja tug landa en nú þegar hefur verið samið um útgáfu á henni í Þýskalandi, Póllandi, Grikklandi og um allan hinn spænskumælandi heim.

meira >

Páll Baldvin Baldvinsson jós bók Ólafs Ragnarsson, Til fundar við skáldið Halldór Laxness, miklu lofi í Kiljunni í Ríkissjónvarpinu í gærkvöldi. Hann sagði að í þessu verki kæmist maður "eina ferðina enn að því hvað [Halldór Laxness] var ótrúlega brilljant." Að mati hans er bókin ákaflega upplýsandi og að hún væri mjög þarft rit. Síðan tók hann undir þá skoðun sem víða hefur heyrst að hér sé komin skemmtilegasta Laxnessbókin. Hér er að finna upptöku á þættinum.

Bók Ólafs Ragnarssonar hefur líklega að geyma síðustu óbirtu samtölin við Halldór Laxness. Þeir fara um víðan völl í spjalli sínu og er óhætt að segja að hér fái lesandinn svolítið aðra mynd af Nóbelsskáldinu en í hinum gömlu viðhafnarviðtölum.

meira >

Aska Yrsu Sigurðardóttur og Guðni - Af lífi og sál eru mest seldu bækur Veraldar á þessari jólavertíð. Yrsa er að setja persónulegt met en Aska selst að minnsta kosti tvöfalt meira en Sér grefur gröf í fyrra. Guðni Ágústsson og Sigmundur Ernir setja markið hátt og hyggjast jafna söluna á ævisögu Jóns Baldvins sem út kom fyrir nokkrum árum og sló öll met.

Aska er í öðru sæti skáldsagnalista Félagsvísindastofnunar sem birtur er í Morgunblaðinu í dag. Og Guðni - Af lífi og sál er í öðru sæti á lista yfir ævisögur. Þá eru þær báðar á lista yfir mest seldu bækur vikunnar þegar allir flokkar eru teknir saman, Guðni í fjórða sæti og Yrsa í því sjötta. Harry Potter sem systurforlag Veraldar, Bjartur, gefur út klemmist þar á milli í fimmta sæti. Það er því gaman að segja frá því að minnst risinn á markaðnum, Bjartur Veröld, er með þrjár af sex mest seldu bókum landsins þessa vikuna - fleiri en nokkur önnur útgáfa.

Aska og Guðni - Af lífi og sál eru báðar uppseldar á lager en nýjar prentanir fara í verslanir í dag og á morgun. Menn þurfa því ekki að örvænta - það verður nóg til fyrir alla. Þess má einnig geta að hvortveggja bókin verður prentuð aftur í næstu viku.

meira >

Menn segja að valt sé veraldargengið en gengi Veraldar  hefur aldrei verið betra en þessar vikurnar. Guðni - Af lífi og sál og Aska eftir Yrsu Sigurðardóttur stefna í algjöra metsölu og á Veröld því tvær af mest seldu bókum landsins þessar vikurnar. Þá tók Páll Baldvin Baldvinsson í Kiljunni í gær undir þá skoðun að Til fundar við skáldið Halldór Laxness sé skemmtilegasta Laxnessbókin.

Menn hafa fagnað af minna tilefni og því drögum við út fimm nýja vinningshafa en að þessu sinni þótti rétt að velja bók sem hæfði tilefninu: Topp tíu. Hinir heppnu eru:
thorir@tryggir.is
bibs@simnet.is
sololga@hotmail.com
ellaclausen@simnet.is
jonafh@strik.is

meira >

Samningar hafa tekist milli bókaforlagsins Veraldar og spænsku útgáfusamsteypunnar Santillana um útgáfu á glæpasögunni Ösku eftir Yrsu Sigurðardóttur í átján spænskumælandi löndum heims. Santillana er með aðalbækistöðvar á Spáni en rekur sjálfstæð dótturforlög í 20 öðrum löndum. Santillana hefur áður gefið út Þriðja táknið og Sér grefur gröf eftir Yrsu. Þá hefur einnig verið gengið frá samningum um útgáfu á Ösku Yrsu á þremur öðrum tungumálum, þýsku, pólsku og grísku. Það er því ljóst að Aska fer á markað í á þriðja tug landa á næstu misserum. Samningaviðræður standa nú yfir við forleggjara Yrsu víða um lönd um útgáfu á Ösku.

 

Aska er þriðja glæpasaga Yrsu en frumraun hennar á því sviði, Þriðja táknið, kemur nú út á 31 tungumáli um allan heim, en engin íslensk skáldsaga eftir núlifandi höfund er væntanleg á jafn mörgum tungumálum.

meira >

Félag íslenskar bókaútgefenda upplýsti í gær að Ólafur Ragnarsson hefði verið gerður að heiðursfélaga í samtökunum. Ólafur var meðal umsvifamestu útgefenda landsins um tveggja áratuga skeið og markaði varanleg spor í íslenska bókaútgáfu. Hann stofnaði Vöku árið 1981 sem festi kaup á Helgafelli árið 1985. Vaka-Helgafell var síðan önnur stoðin í Eddu á móti Máli og menningu þegar hún var stofnuð árið 2000. Ólafur dró sig út úr Eddu árið 2002 en þremur árum síðar setti hann á laggirnar bókaforlagið Veröld ásamt Pétri Má Ólafssyni. Hann varð að draga sig út úr félaginu vegna heilsubrests árið 2006. Hann hélt þó tryggð við forlagið og í haust kom út hjá Veröld stórmerkileg bók hans Til fundar við skáldið Halldór Laxness með einstökum samtölum hans við Nóbelsskáldið. Ólafi eru færðar innilegar hamingjuóskir með verðskuldaðan heiður. meira >

Guðni - Af lífi og sál eftir þá Guðna Ágústsson og Sigmund Erni Rúnarsson og Aska eftir Yrsu Sigurðardóttur eru á slíku flugi í bókaverslunum landsmanna að erfiðlega gengur að anna eftirspurn.

Bækurnar voru varla komnar á markað þegar útgefandinn pantaði ný risaupplög af báðum titlum í Prentsmiðjunni Odda. Nú er svo komið að hvortveggja bókin er uppurin á lager. Síðasta eintakið af Guðna (bókinni) fór af lager í gær og kl. 9.27 í morgun (að staðartíma) hvarf síðasta Askan út um dyrnar. 

Björn Heimir Björnsson, yfiraðalframleiðslustjóri Odda, sagði í samtali við www.verold.is í morgun, eftir að hafa ráðfært sig við framkvæmdastjóra markaðssviðs fyrirtækisins, Eyþór Pál Hauksson, að þar á bæ legðu menn nótt við dag, bættu við vöktum og aukavöktum, svo að afhenda megi bækurnar sem fyrst. Hann segir að takmarkið sé að Oddalestin bruni af stað með bækurnar síðdegis á morgun, miðvikudag, og megi hann hundur heita takist það ekki. Og, eins og áður hefur komið fram á þessum vettvangi: Þegar Björn Heimir, yfiraðalframleiðslustjóri í Odda, hefur talað - (og ráðfært sig við Eyþór Pál Hauksson framkvæmdastjóra markaðssviðs fyrirtækisins) þá hefur hann talað. Aðdáendum Guðna og Ösku er því ráðlagt að halda ró sinni - það verður nóg til fyrir alla!

meira >

Sér grefur gröf eftir Yrsu Sigurðardóttur er níunda mest selda skáldsagan í kilju í Austurríki þessa vikuna og hækkar sig um eitt sæti frá fyrri viku. Listinn birtist í Buchmarkt. Yrsa hefur ekki náð jafn hátt á erlendum metsölulista. Þá situr Sér grefur gröf í 50. sæti þýska kiljulistans sem birtur var í vikunni en bókin stökk beint í 39. sæti listans þegar hún kom út fyrr í mánuðinum. 

Sér grefur gröf kom út á Íslandi í fyrra en fer nú á markað víða um lönd. Spánverjar riðu á vaðið fyrr í sumar, Svíar fylgdu í kjölfarið, Þjóðverjar voru næstir og síðan birtast þær ein af annarri en alls er Sér grefur gröf væntanleg á fjórtán tungumálum, m.a. í Bandaríkjunum og Bretlandi. Þriðja táknið eftir Yrsu er væntanlegt á 31 tungumáli um víða veröld. Nýverið kom út þriðja glæpasaga Yrsu, Aska, og hefur nú þegar verið samið um útgáfu á henni í á þriðja tug landa.

meira >

Hildur Heimisdóttir, gagnrýnandi Fréttablaðsins, gefur Ösku Yrsu Sigurðardóttur fimm stjörnur í sunnudagsblaðinu og gagnrýnandi Morgunablaðsins, Björn Þór Vilhjálmsson, segir í laugardagsblaðinu að Yrsa fari á kostum í persónusköpuninni og lesendur fyrri bóka hennar muni taka Ösku fagnandi. Áður birtist dómur á Kistunni eftir Áka G. Karlsson sem sagði að Aska væri "hörkuvel fléttuð glæpasaga" sem væri "spennandi frá upphafi til enda".

meira >