Hrafn Jökulsson rithöfundur stingur niður penna í laugardagsblaði Morgunblaðsins og sparar ekki stóru orðin. Hann segir að bók Guðna Ágústssonar og Sigmundar Ernis sé fantavel skrifuð og safarík frásögn, ríkulega blönduð kímni. Hann dáist mjög að frásagnaraðferð Sigmundar Ernis og segir að úr verði "einskonar pólitísk spennusaga með litríkri aðalpersónu sem bæði hefur húmor fyrir sjálfum sér og öðrum". Hrafn lýkur grein sinni um bókina Guðni - Af lífi og sál með svofelldum orðum: "Mér fannst bókin um Guðna stórskemmtileg lesning. Vel skrifuð og fróðleg. Og svei mér ef ég varð ekki framsóknarmaður í sæluríkt korter, eftir að lestri lauk. En bara í korter!" meira >

Veröld hefur gengið frá samningum við Damm í Svíþjóð um útgáfu á Ösku eftir Yrsu Sigurðardóttur. Áður hefur verið samið um útgáfu á bókinni í Þýskalandi, Póllandi, Grikklandi og um allan hinn spænskumælandi heim. Yrsa hefur átt mikilli velgengni að fagna í Svíþjóð en Þriðja táknið og Sér grefur gröf hafa báðar komið út þar í landi. Þarlendir gagnrýnendur hafa kallað hana "hina nýju drottningu glæpasögunnar".

Aska kom út um miðjan nóvember og hefur fengið rífandi viðtökur. Hún fer með himinskautum á metsölulistum landsins og dómar hafa verið afar jákvæðir. Fréttablaðið gefur Ösku fimm stjörnur af fimm mögulegum, Morgunblaðið segir að Yrsa fari á kostum í persónusköpuninni og að lesendur fyrri bóka hennar muni taka Ösku fagnandi. Þá sagði í ritdómi á Kistunni að Aska væri "hörkuvel fléttuð glæpasaga" sem væri "spennandi frá upphafi til enda."

meira >

Aska eftir Yrsu Sigurðardóttur stökk beint í annað sæti metsölulista Morgunblaðsins yfir skáldverk sem birtur var í morgun. Aðeins Harðskafi Arnaldar Indriðasonar er ofar. Þetta er besta byrjun Yrsu á jólabókavertíð frá því að hún hóf að senda frá sér bækur. Árangur hennar er þeim eftirtektarverðari fyrir þær sakir að Aska var ekki fáanleg í Bónus vikuna sem mæld var en hann vegur þungt í könnuninni. Samningaviðræður um sölu bóka Veraldar í verslunum Bónuss eru á lokastigi og verður Aska - ásamt öðrum metsölubókum Veraldar - vonandi fáanleg þar nú fyrir helgina. meira >

Bókaforlagið Veröld hefur gefið út bókina Fyrirboðar, tákn og draumaráðningar eftir Símon Jón Jóhannsson. Hvað merkir að dreyma mynd af elskhuga sínum? Hvaða vísbendingar um kyn barna koma fram á meðgöngu? Er varasamt að byrja á einhverju nýju á föstudögum? Hvað merkir talan sjö? Hvernig getum við ráðið í vísbendingar um fortíð okkar, nútíð og framtíð og túlkað það sem fyrir ber í vöku og draumi?

Þessi ómissandi handbók opnar lesendum sýn inn í heillandi veröld og ætti hún að höfða jafnt til ungra sem aldinna.

meira >

Lögmaður Veraldar hefur dregið út einn þátttakanda í Veröldinni okkar. Sá heppni hlýtur dagsferð fyrir tvo til Vestmannaeyja í boði Flugfélags Íslands á sögusvið nýrrar glæpasögu, Yrsu Sigurðardóttur, en hún nefnist Aska. Sumarið 2007 koma í ljós líkamsleifar við uppgröft húss sem fór undir ösku í eldgosinu í Eyjum árið 1973. Á sama tíma finnst kona myrt í Reykjavík. Og Þóra Guðmundsdóttir lögmaður, sem lesendur þekkja úr fyrri bókum hennar, glímir við spurninguna: Hvernig tengjast þessi voðaverk?

meira >

Guðni Ágústsson og Yrsa Sigurðardóttir koma með miklum látum inn á jólabókamarkaðinn en bókunum var dreift í verslanir í lok síðustu viku. Ævisaga Guðna Sigmund Erni Rúnarsson stökk beint í fyrsta sæti metsölulista Eymundssonar yfir handbækur, fræðibækur og ævisögur sem birtur var í morgun og Yrsa þrumaði sér í annað sæti á skáldsagnalista Hagkaupa á lista sem birtur var í gær - Harðskafi Arnaldar var einn fyrir ofan. Yrsa og Guðni sátu síðan hlið við hlið á metsölulista vikunnar í Eymundsson yfir allar bækur, Aska Yrsu var í fjórða og Guðni sæti neðar.

Menn hafa fagnað af minna tilefni og því ákváðum við að draga út heppinn þátttakanda í Veröldinni okkar sem fær hvorki meira né minna en flugmiða fyrir tvo til Prag - og bæði Ösku og Guðna - Af lífi og sál. Eftirfarandi netfang var dregið út: irram@simnet.is.

meira >

Bandaríska stórblaðið Boston Globe segir að í Þriðja tákninu eftir Yrsu Sigurðardóttur leggi lesandinn upp í "heillandi leiðangur" en bókin kom út vestra fyrir skemmstu. Philadelphia  Inquirer fullyrðir að framvinda sögunnar sé í hárréttu tempói, að mati gagnrýnanda Minneapolis Star Tribune er sagan "hugvitssamlega fléttuð" og tímaritið Mystery Scene lýsir þeirri von sinni að Þrijða táknið sé upphaf að bókaflokki um Þóru Guðmundsdóttur lögmann.

Áður hefur New York Times sagt að Þriðja táknið sé "frumleg" og Wall Street Journal að sagan "haldi athygli jafnvel lúnustu lesenda". Engin íslensk skáldsaga eftir núlifandi höfund er væntanleg á fleiri tungumálum en Þriðja táknið.

meira >

Bókaforlagið Veröld hefur gengið frá samningum um útgáfu á væntanlegri glæpasögu Yrsu Sigurðardóttur, Ösku, í Þýskalandi og Póllandi. Aska er komin á færibandið í Prentsmiðjunni Odda og verður henni dreift í verslanir nú í nóvember. Þá hefur útgáfurétturinn á Þriðja tákninu verið seldur til Tyrklands. Þar með er ljóst að bókin kemur út á 31 tungumáli en engin íslensk skáldsaga eftir núlifandi rithöfund, er væntanleg á jafn mörgum erlendum tungumálum og Þriðja táknið. Þá hefur nú þegar verið gengið frá samningum um útgáfu á Sér grefur gröf austan hafs og vestan.

meira >

Stórvirki Ólafs Ragnarssonar, Til fundar við skáldið Halldór Laxness, er nú komið í verslanir en bilun í Odda tafði útgáfuna. Hér bregður Ólafur upp mynd af rithöfundinum og manninum Halldóri Laxness og byggir þar að stærstum hluta á kynnum þeirra í tæp þrettán ár, samskiptum skálds og útgefanda. Lesandinn heldur til fundar við Halldór, fylgist með samtölum þeirra og nýtur þess að vera í glaðlegri návist Nóbelsskáldsins. Líklega eru í þessari bók síðustu óbirtu samtölin við Halldór Laxness – og einhver þau skemmtilegustu. meira >

Bókin Abbababb! eftir Dr. Gunna með myndum eftir Fanneyju Sizemore er nú komin í verslanir. Bókin byggir á samnefndum söngleik sem gengið hefur fyrir fullu húsi undanfarið og fékk Grímuverðlaunin 2007 sem besta barnasýningin.  

Í Abbababb! fæst leynifélagið Rauða hauskúpan við dularfullt sakamál þar sem við sögu koma meðal annars diskóboltar og pönkarar, Pála spákona og Doddi draugur, að ógleymdum skuggalegum Rússum og Hr. Rokk.

 

Óhætt er að segja að hér sé á ferð bráðskemmtileg saga fyrir hressa krakka!

meira >